అమరావతి, 14 నవంబర్ (హి.స.)ఏపీలో కూటమి ప్రభుత్వం ప్రతిష్ఠాత్మకంగా ప్రారంభించిన 'స్త్రీ శక్తి' పథకం ఏపీఎస్ ఆర్టీసీకి నూతనోత్సాహాన్నిచ్చింది. మహిళలకు ఉచిత బస్సు ప్రయాణ సౌకర్యం కల్పించడంతో ప్రయాణికుల సంఖ్య రికార్డు స్థాయిలో పెరిగి, బస్సులు కళకళలాడుతున్నాయి. అయితే, అదే సమయంలో విపరీతమైన రద్దీ, పాత బస్సుల నిర్వహణ వంటి కొత్త సవాళ్లు సంస్థను ఇబ్బందులకు గురిచేస్తున్నాయి. ఈ నేపథ్యంలో ప్రభుత్వం 'స్త్రీ శక్తి' పథకం రీయింబర్స్‌మెంట్ కింద ఆర్టీసీకి రూ. 400 కోట్లు విడుదల చేయడం కొంత ఊరటనిచ్చింది.

రికార్డు స్థాయిలో ప్రయాణికులు

ఈ ఏడాది ఆగస్టు 15న ముఖ్యమంత్రి చంద్రబాబు, ఉప ముఖ్యమంత్రి పవన్ కల్యాణ్ ప్రారంభించిన ఈ పథకానికి అనూహ్య స్పందన లభించింది. పథకం అమల్లోకి వచ్చాక ఆర్టీసీ బస్సుల్లో ఆక్యుపెన్సీ రేటు 66 శాతం నుంచి ఏకంగా 88 శాతానికి పెరిగింది. గత ఏడాది సెప్టెంబరులో రోజువారీ సగటు ప్రయాణికుల సంఖ్య 35.70 లక్షలు ఉండగా, ఈ ఏడాది అదే నెలకు 46.24 లక్షలకు చేరింది. అంటే, ప్రతిరోజూ అదనంగా 10.54 లక్షల మంది ప్రయాణిస్తున్నారని అధికారిక గణాంకాలు స్పష్టం చేస్తున్నాయి. ఈ పెరుగుదల పూర్తిగా మహిళా ప్రయాణికుల వల్లే సాధ్యమైందని ఆర్టీసీ అధికారులు విశ్లేషిస్తున్నారు.

ప్రభుత్వం మద్దతు.. యూనియన్ల హర్షం

'స్త్రీ శక్తి' పథకానికి ప్రభుత్వం అండగా నిలిచింది. ఆగస్టు 15 నుంచి అక్టోబరు 31 వరకు 75 రోజులకు గాను రూ. 400 కోట్లను రీయింబర్స్‌మెంట్ కింద విడుదల చేసింది. ఈ నిర్ణయంపై ఆర్టీసీ నేషనల్ మజ్దూర్ యూనియన్, ఎంప్లాయీస్ యూనియన్ నేతలు హర్షం వ్యక్తం చేశారు. ముఖ్యమంత్రి చంద్రబాబు, ఆర్థిక మంత్రి పయ్యావుల కేశవ్‌, ఆర్టీసీ ఎండీ ద్వారకా తిరుమలరావులకు కృతజ్ఞతలు తెలిపారు. అయితే, పథకం దీర్ఘకాలంలో విజయవంతం కావాలంటే తక్షణమే 3 వేల కొత్త బస్సులను కొనుగోలు చేసి, 10 వేల ఖాళీలను భర్తీ చేయాలని వారు ప్రభుత్వాన్ని కోరారు.

---------------

హిందూస్తాన్ సమచార్ / SANDHYA PRASADA PV