హైదరాబాద్, 19 జూలై (హి.స.)

తెలుగు చిత్ర పరిశ్రమలో మరో విషాదం

చోటుచేసుకుంది. ప్రముఖ హాస్య నటుడు ఫిష్ వెంకట్ హైదరాబాద్ లోని ఓ ప్రైవేట్ ఆసుపత్రిలో తుదిశ్వాస విడిచారు. గత కొంతకాలంగా కిడ్నీ, లివర్ సంబంధిత ఆరోగ్య సమస్యలతో బాధపడుతున్న ఆయన పరిస్థితి విషమించడంతో కన్నుమూశారు. ఆయన వయసు 53 సంవత్సరాలు. ఫిష్ వెంకట్కు రెండు కిడ్నీలు పూర్తిగా పాడవడంతో డయాలసిస్ చేయించుకుంటూ జీవితం కొనసాగించేవారు. వైద్యులు కిడ్నీ మార్పిడి అవసరమని సిఫార్సు చేసినా, అవసరమైన ఆర్థిక సహాయం అందకపోవడం, సరైన దాతలు దొరకకపోవడం విషాదకరంగా మారింది. అంతేకాదు, రక్తపోటు (బీపీ), షుగర్ అదుపులో లేకపోవడంతో ఇతర అవయవాల పనితీరు దెబ్బతిని చివరికి చికిత్సలకు శరీరం స్పందించలేదు. దాంతో ఆయన తుది శ్వాస విడిచారు.

ఫిష్ వెంకట్ అసలు పేరు ముంగిలంపల్లి వెంకటేష్.

1971 ఆగస్టు 3న ఆంధ్రప్రదేశ్లోని మచిలీపట్నంలో జన్మించిన ఆయన, చిన్నతనంలో హైదరాబాద్కు వలస వచ్చారు. ముషీరాబాద్లోని కూరగాయల మార్కెట్లో చేపలు అమ్మే వ్యాపారం చేసేవారు. అందుకే అభిమానులు, సహచరులు ఆయనను “ఫిష్ వెంకట్” అని పిలిచేవారు.

---------------

హిందూస్తాన్ సమచార్ / సంపత్ రావు, జర్నలిస్ట్..