అమరావతి, 15 నవంబర్ (హిం.స) తేజ సజ్జా, శివానీ రాజశేఖర్ జంటగా రూపొందిన చిత్రం ‘అద్భుతం’. మల్లిక్ రామ్ దర్శకుడు. ప్రశాంత్ వర్మ కథ అందించారు. ఈ సినిమా నేరుగా డిజిటల్ మాధ్యమంలో విడుదలవుతోంది. ప్రముఖ ఓటీటీ ‘డిస్నీ ప్లస్ హాట్స్టార్’లో నవంబర్ 19 నుంచి స్ట్రీమింగ్ కానుంది. ఈ సందర్భంగా నటుడు రామ్ చిత్ర ట్రైలర్ను విడుదల చేశారు. ఓ అమ్మాయికి, ఓ అబ్బాయికి.. ఒకే ఫోన్ నంబరు ఉంటే ఏమవుతుందనే విభిన్న కాన్సెప్ట్తో ఈ చిత్రం రూపొందినట్టు ట్రైలర్ను చూస్తే అర్థమవుతోంది. కామెడీ, సస్పెన్స్ సన్నివేశాలతో ఆద్యంతం ఆసక్తిగా సాగింది. మరి తేజ, శివానీ జీవితంలో జరిగిన అద్భుతం ఏంటి? ఒకే ఫోన్ నంబరును ఎలా వినియోగించారు? తెలియాలంటే సినిమా చూడాల్సిందే. చంద్రశేఖర్ మొగుళ్ల నిర్మించిన ఈ చిత్రానికి రథన్ సంగీతం అందించారు.

హిందూస్తాన్ సమాచార్ /నాగరాజ్