న్యూడిల్లీ , 24 మే (హి.స.)

భారత్, అమెరికాలు కేవలం మిత్రదేశాలు మాత్రమే కావని, ప్రపంచంలోని వివిధ ప్రాంతాల్లో కలిసి పనిచేసే వ్యూహాత్మక భాగస్వాములని అమెరికా విదేశాంగ మంత్రి మార్కో రూబియో స్పష్టం చేశారు. నాలుగు రోజుల భారత పర్యటనలో భాగంగా ఢిల్లీకి వచ్చిన ఆయన, భారత విదేశాంగ మంత్రి ఎస్. జైశంకర్తో సమావేశమయ్యారు. ఈ సందర్భంగా ఇరు దేశాల ప్రతినిధి బృందాల మధ్య జరిగిన చర్చల్లో రూబియో మాట్లాడుతూ, ఇరు దేశాల మధ్య ఉన్న వ్యూహాత్మక బంధమే ఈ సంబంధాన్ని ప్రత్యేకంగా నిలుపుతోందని అన్నారు.

అమెరికా, భారత్ కేవలం మిత్రపక్షాలు కాదు. మనం వ్యూహాత్మక మిత్రులం. ఇది చాలా కీలకమైన అంశం. మేం ప్రపంచంలోని అనేక దేశాలతో వివిధ అంశాలపై పనిచేస్తాం. కానీ, మన వ్యూహాత్మక భాగస్వామ్యం ఈ బంధాన్ని ప్రత్యేకంగా నిలుపుతుంది. ఎందుకంటే ఇది కేవలం ఒక ప్రాంతానికి మాత్రమే పరిమితం కాదు. పశ్చిమార్ధగోళం వంటి సుదూర ప్రాంతాలతో సహా ప్రపంచవ్యాప్తంగా కలిసి పనిచేసే అవకాశాలను ఇది అందిస్తుంది అని రూబియో వివరించారు.

ప్రపంచంలోని రెండు అతిపెద్ద ప్రజాస్వామ్య దేశాలుగా భారత్, అమెరికాలకు అనేక ఉమ్మడి ప్రయోజనాలు ఉన్నాయని ఆయన గుర్తుచేశారు. మన రెండు దేశాలు ప్రపంచంలోనే అతిపెద్ద ప్రజాస్వామ్యాలు. అద్భుతమైన సహకారానికి ఇదే బలమైన పునాది. మన మధ్య ఎన్నో ఉమ్మడి ప్రయోజనాలు ఉన్నాయి. ఇప్పటికే పటిష్టంగా, దృఢంగా ఉన్న ఈ వ్యూహాత్మక భాగస్వామ్యాన్ని మరింత ముందుకు తీసుకెళ్లడమే మన లక్ష్యం. కొందరు చెప్పినట్లు ఇది సంబంధాలను పునరుద్ధరించుకోవడం కాదు, ఇప్పటికే ఉన్న బలాన్ని మరింత పెంచుకోవడం అని ఆయన పేర్కొన్నారు.

---------------

హిందూస్తాన్ సమచార్ / Santhosha Laxmi