ఢీల్లీ, 4 జూన్ (హి.స.)

ఐపీఎల్‌లో 18 ఏళ్ల సుదీర్ఘ నిరీక్షణకు తెరదించుతూ రాయల్ ఛాలెంజర్స్ బెంగళూరు (ఆర్సీబీ) జట్టు తొలిసారిగా ట్రోఫీని ముద్దాడింది. ఉత్కంఠభరితంగా సాగిన ఫైనల్ మ్యాచ్‌లో పంజాబ్ కింగ్స్‌పై గెలుపొంది, 2008లో ఫ్రాంచైజీ ప్రారంభమైన నాటి నుంచి ఎదురుచూస్తున్న కలను ఆర్సీబీ సాకారం చేసుకుంది. ఈ చారిత్రక విజయం అభిమానుల్లో, మాజీ భాగస్వాముల్లో ఆనందోత్సాహాలను నింపగా... ఆర్సీబీ వ్యవస్థాపకుడు విజయ్ మాల్యా స్పందన అందరి దృష్టిని ఆకర్షించింది.

2008లో బెంగళూరు ఫ్రాంచైజీని కొనుగోలు చేసి, జట్టు ప్రారంభ సంవత్సరాల్లో కీలక పాత్ర పోషించిన విజయ్ మాల్యా... ఈ విజయంపై సోషల్ మీడియా వేదికగా తన భావోద్వేగాలను పంచుకున్నారు. నేను ఆర్సీబీని స్థాపించినప్పుడు, ఐపీఎల్ ట్రోఫీ బెంగళూరుకు రావాలన్నది నా కల అని ఆయన 'ఎక్స్' (గతంలో ట్విట్టర్) లో రాసుకొచ్చారు. జట్టు తొలి రోజుల్లో యువ ఆటగాడిగా ఉన్న విరాట్ కోహ్లీని ఎంపిక చేయడం వంటి కీలక ఘట్టాలను ఆయన గుర్తుచేసుకున్నారు. విరాట్ కోహ్లీ దాదాపు రెండు దశాబ్దాలుగా ఆర్సీబీ జట్టుతోనే కొనసాగుతుండటం విశేషం.

అంతేకాకుండా, ఆర్సీబీ జట్టుకు మారుపేరుగా నిలిచిన విధ్వంసకర ఆటగాళ్లు క్రిస్ గేల్, ఏబీ డివిలియర్స్‌లను జట్టులోకి తీసుకోవడం వంటి తన నిర్ణయాలను కూడా మాల్యా ఈ సందర్భంగా ప్రస్తావించారు. చివరకు ఐపీఎల్ ట్రోఫీ బెంగళూరుకు చేరింది. నా కలను నిజం చేసిన ప్రతి ఒక్కరికీ అభినందనలు, ధన్యవాదాలు. ఆర్సీబీ అభిమానులు ఎప్పుడూ బెస్ట్. వారు ఈ ఐపీఎల్ ట్రోఫీకి అర్హులు. ఈ సారి కప్ బెంగళూరు బరుతే (ఈసారి కప్ బెంగళూరుకే వస్తుంది)! అంటూ మాల్యా తన పోస్ట్‌లో పేర్కొన్నారు.

ఆర్థిక మోసం ఆరోపణల నేపథ్యంలో 2016లో భారత్ విడిచి వెళ్లిన విజయ్ మాల్యా, ఆర్సీబీ వ్యవహారాల నుంచి దూరంగా ఉన్నప్పటికీ, జట్టు ప్రయాణం పట్ల మానసికంగా ఎంతో మమేకమై ఉన్నారు. అద్భుతమైన ఆటతీరుతో, ఉత్కంఠభరితమైన ఫైనల్ విజయంతో ఆర్సీబీ ట్రోఫీని కైవసం చేసుకున్న తరుణంలో మాల్యా చేసిన అభినందన సందేశం సామాజిక మాధ్యమాల్లో వైరల్ గా మారింది.

కొందరు ఆయనను ప్రశంసిస్తూ కామెంట్లు చేయగా, మరికొందరు ఆయన పరారీ ఉదంతాన్ని ప్రస్తావిస్తూ సరదాగా వ్యాఖ్యానించారు. కొందరు నెటిజన్లు ఆయనను భారత్‌కు తిరిగి వచ్చి సంబరాల్లో పాల్గొనాలని ఆహ్వానించగా, మరికొందరు యూకేలో ఆయనపై ఉన్న న్యాయపరమైన చిక్కులను గుర్తుచేశారు.

---------------

హిందూస్తాన్ సమచార్ / సంధ్య ప్రసాద పి.వి