న్యూఢిల్లీ, 11 అక్టోబర్ (హి.స.)

సౌదీ అరేబియా రాజధాని రియాద్‌లోని కింగ్ ఖాలిద్ అంతర్జాతీయ విమానాశ్రయంపై జరిగిన విధ్వంసకర క్షిపణి దాడిని భారత ప్రభుత్వం తీవ్రస్థాయిలో నిరసించింది. అక్టోబర్ 10న జరిగిన ఈ దారుణ ఘటనలో 12 మంది పౌరులు ప్రాణాలు కోల్పోగా, 300 మందికి పైగా తీవ్రంగా గాయపడ్డారు. పౌర రవాణా మౌలిక సదుపాయాలే లక్ష్యంగా నిరంతరం జరుగుతున్న ఇలాంటి దాడులు ఏమాత్రం సహించరానివని, అంతర్జాతీయ నిబంధనలకు విరుద్ధమని భారత విదేశాంగ మంత్రిత్వ శాఖ ఒక ప్రకటనలో స్పష్టం చేసింది.

దేశీయ విమానాల రాకపోకల కోసం కేటాయించిన టెర్మినల్స్ 3, 4 ప్రాంతాలను లక్ష్యంగా చేసుకుని ఈ క్షిపణి దాడి జరిగింది. గత పదేళ్ల కాలంలో సౌదీ అరేబియా భూభాగంలో చోటుచేసుకున్న అత్యంత నష్టదాయకమైన ఘటనగా దీనిని భద్రతా వర్గాలు పేర్కొంటున్నాయి. ఈ వారంలోనే రియాద్ విమానాశ్రయంపై వరుసగా మూడోసారి దాడి జరగడం గమనార్హం. యెమెన్‌కు చెందిన ఇరాన్ మద్దతుగల హౌతీ తిరుగుబాటుదారులే ఈ ఘాతుకానికి ఒడిగట్టారని సౌదీ సంకీర్ణ బలగాలు వెల్లడించాయి.

ఈ దాడిలో మరణించిన వారిలో సౌదీ స్థానికులతో పాటు అమెరికా, బంగ్లాదేశ్, ఈజిప్ట్, పాలస్తీనా, సిరియా, సూడాన్, జోర్డాన్ దేశాలకు చెందిన పౌరులు ఉన్నారు. సౌదీ అరేబియా సార్వభౌమాధికారాన్ని కాపాడే క్రమంలో ఆ దేశ ప్రభుత్వానికి, ప్రజలకు భారత్ పూర్తి అండగా నిలుస్తుందని విదేశాంగ శాఖ పునరుద్ఘాటించింది. పౌరుల భద్రతను ప్రమాదంలో పడేసే చర్యలను తక్షణమే నిలిపివేసి, ప్రాంతీయ ప్రశాంతతను పునరుద్ధరించాలని విజ్ఞప్తి చేసింది. ప్రమాదం దృష్ట్యా శనివారం విమానాశ్రయ సేవలను తాత్కాలికంగా నిలిపివేసి, విమానాలను ఇతర ప్రాంతాలకు దారి మళ్లించారు

---------------

హిందూస్తాన్ సమచార్ / Santhosha Laxmi