న్యూఢిల్లీ, 11 అక్టోబర్ (హి.స.)

దేశంలో ప్రజాస్వామ్య రక్షణ, నిరుద్యోగ నిర్మూలన లక్ష్యంగా యువత చేస్తున్న పోరాటానికి కాంగ్రెస్ అగ్రనేత రాహుల్ గాంధీ పూర్తి మద్దతు ప్రకటించారు. తమ హక్కుల సాధన కోసం చేపడుతున్న నిరసనలను ఎట్టి పరిస్థితుల్లోనూ ఆపవద్దని ఆయన పిలుపునిచ్చారు. యువత ఎవరికీ భయపడాల్సిన అవసరం లేదని, వారి వెనుక తాను కొండంత అండగా ఉంటానని స్పష్టం చేశారు. యువశక్తి దేశ మార్పునకు ప్రధాన మూలస్తంభమని, న్యాయమైన డిమాండ్ల సాధన కోసం శాంతియుత మార్గంలో తమ నిరసనలను కొనసాగించాలని విజ్ఞప్తి చేశారు.

కేంద్ర ప్రభుత్వం అనుసరిస్తున్న వ్యతిరేక విధానాల వల్ల కోట్లాది మంది యువకులు తీవ్ర ఉపాధి సంక్షోభాన్ని ఎదుర్కొంటున్నారని రాహుల్ గాంధీ తీవ్ర ఆందోళన వ్యక్తం చేశారు. ప్రశ్నించే గొంతులను తొక్కిపెట్టే ప్రయత్నాలు జరుగుతున్నాయని, ఇలాంటి తరుణంలో యువత వెనకడుగు వేయకూడదని పిలుపునిచ్చారు. యువత నిరుత్సాహపడకుండా తమ భవిష్యత్తు కోసం గళమెత్తాలని, కాంగ్రెస్ పార్టీ మరియు తాను స్వయంగా వారి తరఫున చివరి వరకు పోరాడతామని హామీ ఇచ్చారు.

సమస్యలపై స్పందిస్తున్న యువతపై కేసులు పెట్టి భయభ్రాంతులకు గురిచేయడం ప్రజాస్వామ్య సూత్రాలకు విరుద్ధమని ఆయన విమర్శించారు. రాజ్యాంగం కల్పించిన నిరసన తెలిపే హక్కును కాపాడుకోవాల్సిన బాధ్యత అందరిపైనా ఉందన్నారు. ప్రజాస్వామ్యాన్ని బ్రతికించుకోవడానికి, ఉపాధి అవకాశాలను సాధించుకోవడానికి దేశవ్యాప్తంగా యువత కలసికట్టుగా ముందుకు సాగాలని రాహుల్ గాంధీ పిలుపునిచ్చారు. ఈ వ్యాఖ్యలు ప్రస్తుతం దేశ రాజకీయాల్లో అత్యంత ప్రాధాన్యతను సంతరించుకున్నాయి

---------------

హిందూస్తాన్ సమచార్ / Santhosha Laxmi