న్యూఢిల్లీ, 12 అక్టోబర్ (హి.స.)
దేశ రాజధాని న్యూఢిల్లీలో దశాబ్దాలుగా అనేక నిరసనలు, ధర్ణాలకు ముఖ్య చిరునామాగా నిలిచిన జంతర్ మంతర్ వద్ద ఇకపై ఎలాంటి ఆందోళనలు చేపట్టడానికి వీలులేకుండా ఢిల్లీ పోలీసులు కీలక నిర్ణయం తీసుకున్నారు. నిర్దేశిత నిరసన ప్రదేశాల జాబితా నుంచి జంతర్ మంతర్‌ను పూర్తిగా తొలగిస్తూ (డీ-నోటిఫై చేస్తూ) ఉత్తర్వులు జారీ చేశారు. ప్రజలు, వివిధ రాజకీయ పార్టీలు లేదా ప్రజా సంఘాలు తమ నిరసనలను వ్యక్తం చేయడానికి వీలుగా ప్రత్యామ్నాయంగా మూడు వేర్వేరు ప్రాంతాలను పోలీసులు కొత్తగా ఖరారు చేశారు. సెంట్రల్ ఢిల్లీలోని రామ్‌లీలా మైదాన్, నార్త్ ఢిల్లీలోని బురారీ మైదాన్, అలాగే ఈస్ట్ ఢిల్లీలోని సీబీడీ (CBD) గ్రౌండ్‌లను నూతన నిరసన వేదికలుగా ప్రకటించారు.
ఈ మార్పులకు సంబంధించి ఢిల్లీ పోలీస్ కమిషనర్ సవరించిన స్టాండింగ్ ఆర్డర్ నంబర్ ఎల్&ఓ/48/2026 ను అధికారికంగా వెలువరించారు. పౌరుల నిరసన హక్కును కాపాడుతూనే, శాంతిభద్రతల రక్షణ కోసం ప్రత్యామ్నాయ అనువైన వేదికలను పరిశీలించేందుకు కేంద్ర హోంశాఖ ఏర్పాటు చేసిన ప్రత్యేక కమిటీ సిఫారసుల ఆధారంగానే ఈ నిర్ణయం తీసుకున్నట్లు పోలీసులు తెలిపారు. గతంలో 2022 ఏప్రిల్ 28న జారీ చేసిన ఆదేశాల్లో పాక్షిక సవరణలు చేస్తూ ఈ కొత్త మార్గదర్శకాలను అమల్లోకి తెచ్చారు. ఈ ప్రతిపాదిత మూడు ప్రాంతాలలో నిరసనలు, ప్రదర్శనలు నిర్వహించడానికి పాటించాల్సిన సవరించిన నిబంధనలు (SOP) మరియు పూర్తి వివరాలను త్వరలోనే విడిగా విడుదల చేయనున్నట్లు వెల్లడించారు.
భారత ఎన్నికల సంఘం పనితీరుకు నిరసనగా ప్రతిపక్ష కూటమితో పాటు కాకరోచ్ జనతా పార్టీ (CJP) పెద్ద ఎత్తున ఆందోళనకు సిద్ధమవుతున్న తరుణంలో ఈ సంచలన నిర్ణయం వెలువడటం ప్రాధాన్యం సంతరించుకుంది. ముఖ్యంగా, నిరసన తెలిపేందుకు తమకు జంతర్ మంతర్ వద్ద ఏ రోజు అనుమతినిస్తారో స్పష్టం చేయాలని సీజేపీ నాయకులు ఢిల్లీ పోలీసులను కలిసి 24 గంటల అల్టిమేటం జారీ చేసిన కొద్ది గంటల్లోనే ఈ కీలక పోలీసు ఆదేశాలు వెలువడడం గమనార్హం.
మరోవైపు, ముందుజాగ్రత్త చర్యగా జంతర్ మంతర్ మరియు దాని పరిసర ప్రాంతాల్లో ఢిల్లీ పోలీసులు కట్టుదిట్టమైన భద్రతా బందోబస్తును కొనసాగిస్తున్నారు. ఆదివారం నుంచే ప్రధాన రహదారులు, జంక్షన్ల వద్ద బారికేడ్లను ఏర్పాటు చేసి రవాణాను క్రమబద్ధీకరించారు. అనుమతి లేకుండా ఎవరూ గుమిగూడకుండా, ఏవిధమైన ఆందోళనలు చేపట్టకుండా ప్రత్యేక పోలీసు బలగాలను మోహరించి నిరంతరం నిఘా ఉంచుతున్నారు.
---------------
హిందూస్తాన్ సమచార్ / Santhosha Laxmi
