హైదరాబాద్ , 18 అక్టోబర్ (హి.స.)

రాష్ట్రంలో వివిధ పోటీ పరీక్షల తేదీలు ఒకే సమయంలో రావడం (క్లాష్ కావడం) వల్ల తీవ్ర ఇబ్బందులు పడుతున్న నిరుద్యోగ అభ్యర్థులు మరియు విద్యార్థులు నేడు హైదరాబాద్లోని తెలంగాణ రాష్ట్ర పబ్లిక్ సర్వీస్ కమిషన్ (TGPSC) కార్యాలయం ఎదుట నిరసన ప్రదర్శన నిర్వహించారు.

వేర్వేరు ఉద్యోగాలకు సంబంధించిన రాత పరీక్షలు ఒకే రోజు లేదా అతి తక్కువ వ్యవధిలో షెడ్యూల్ కావడం వల్ల తాము ఏ ఒక్క పరీక్షను కూడా సరిగ్గా రాయలేకపోతున్నామని ఆవేదన వ్యక్తం చేశారు. ఏళ్ల తరబడి ఎంతో కష్టపడి ప్రిపేర్ అవుతున్న తమ భవితవ్యాన్ని పరీక్షల షెడ్యూల్ గందరగోళం ప్రశ్నార్థకం చేస్తోందని అభ్యర్థులు మండిపడ్డారు. TGPSC అధికారులు స్పందించి, పరీక్షల తేదీలను వేర్వేరు సమయాల్లో నిర్వహించేలా రివైజ్డ్ షెడ్యూల్ను విడుదల చేయాలని డిమాండ్ చేశారు. నిరుద్యోగులు పెద్ద సంఖ్యలో కార్యాలయం ముందుకు చేరుకుని ప్రభుత్వానికి, కమిషన్కు వ్యతిరేకంగా నినాదాలు చేశారు. పోలీసులు సంఘటనా స్థలానికి చేరుకుని ఆందోళనకారులను శాంతింపజేసే ప్రయత్నం చేశారు. అభ్యర్థుల సమస్యలను ఉన్నతాధికారుల దృష్టికి తీసుకువెళ్తామని పోలీసులు హామీ ఇవ్వడంతో కొద్దిసేపటి తర్వాత ఆందోళన విరమించారు. నిరుద్యోగుల ఇబ్బందులను దృష్టిలో ఉంచుకుని ప్రభుత్వం వెంటనే జోక్యం చేసుకుని తగిన నిర్ణయం తీసుకోవాలని పలు విద్యార్థి సంఘాలు కోరాయి.

---------------

హిందూస్తాన్ సమచార్ / పుట్టా సుమన్