కాకినాడ, 22 అక్టోబర్ (హి.స.)కాకినాడ జిల్లాలో ఘోర రోడ్డు ప్రమాదం చోటుచేసుకుంది. కత్తిపూడిలో టీ తాగేందుకు రోడ్డు దాటుతున్న నలుగురు భవానీ భక్తులను స్కార్పియో వాహనం ఢీకొట్టింది. ఘటనాస్థలిలోనే ముగ్గురు మృతిచెందగా, ఆస్పత్రికి తరలిస్తుండగా దారిలో మరొకరు మరణించారు.

భవానీ అమ్మవారి దర్శనానికి వెళ్తున్న భక్తులపై కారు దూసుకెళ్లిన ఘటన తీవ్ర విషాదాన్ని నింపింది. స్థానికులు తీవ్ర దిగ్భ్రాంతికి గురయ్యారు.

ఘటనను గమనించిన స్థానికులు వెంటనే సహాయక చర్యలు చేపట్టి క్షతగాత్రులను ఆసుపత్రికి తరలించేందుకు ప్రయత్నించారు.

సమాచారం అందుకున్న పోలీసులు ఘటనాస్థలానికి చేరుకుని పరిస్థితిని పరిశీలించారు. ప్రమాదానికి కారణమైన కారు డ్రైవర్ నిర్లక్ష్యమా, అతివేగమా అనే కోణాల్లో విచారణ చేపట్టాల్సి ఉంది. మృతుల వివరాలు, క్షతగాత్రుల పరిస్థితిపై పూర్తి సమాచారం తెలియాల్సి ఉంది.

భక్తుల రాకపోకలు ఎక్కువగా ఉండే మార్గాల్లో వాహనదారులు అప్రమత్తంగా వ్యవహరించాలని ఈ ఘటన మరోసారి గుర్తుచేస్తోంది. ముఖ్యంగా పాదయాత్రలు, ఆధ్యాత్మిక కార్యక్రమాల సమయంలో వాహనాల వేగాన్ని నియంత్రించడం, రహదారి భద్రతా నిబంధనలు పాటించడం అత్యవసరం.

---------------

హిందూస్తాన్ సమచార్ / పుట్టా సుమన్