శ్రీనగర్, అక్టోబర్ 23 (హి.స)

శీతాకాలం సమీపిస్తుండటంతో, కాశ్మీర్ లోయ ప్రజలు సాంప్రదాయ ఫేరన్ కొనుగోలు ప్రారంభించారు. దేశ ఇతర ప్రాంతాలలో, ముఖ్యంగా ఉత్తర భారతదేశంలో ఈ దుస్తులకు గిరాకీ వేగంగా పెరుగుతోందని హిందుస్తాన్ సమాచార్ ప్రతినిధి పేర్కొన్నారు.

ఫేరన్ అనేది శీతాకాలపు చలి నుండి రక్షణ పొందడానికి కాశ్మీర్‌లో ధరించే వదులైన, పొడవైన గౌను. ఇది ఇప్పుడు కేవలం లోయకే పరిమితం కాలేదు. దీని ప్రత్యేక డిజైన్, సౌకర్యం దేశవ్యాప్తంగా, విదేశాలలో దీనికి ప్రత్యేక స్థానాన్ని తెచ్చిపెట్టాయి. దీనికి రోజురోజుకూ గిరాకీ పెరుగుతోంది.

చరిత్రకారుడు, కవి జరీఫ్ అహ్మద్ జరీఫ్ హిందుస్తాన్ సమాచార్ ప్రతినిధితో వివరంగా మాట్లాడుతూ.. ఫేరన్ అనేది కేవలం ఒక దుస్తులు మాత్రమే కాకుండా, కాశ్మీర్ సంస్కృతిలో ఒక ముఖ్యమైన భాగమని అభివర్ణించారు. కాశ్మీర్‌లో వాతావరణాన్ని బట్టి ఫేరన్ ధరిస్తారు. శీతాకాలంలో చలి తీవ్రంగా ఉన్నప్పుడు స్థానిక భాషలో పోట్ లేదా మునెల్ అని పిలిచే వెచ్చని వస్త్రంతో చేసేవారు. వేసవిలో కాటన్ ఫేరన్ ధరించేవారు. కాలక్రమేణా, దేశంలోని వివిధ ప్రాంతాల నుండి వివిధ రకాల వెచ్చని వస్త్రాలు ఇక్కడికి రావడం ప్రారంభమైంది. వాటి నుండి ఫేరన్లు తయారు చేయడం ప్రారంభమైంది.

కాశ్మీర్‌ను ఇరాన్-యే-సగీర్ (చిన్న ఇరాన్) అని కూడా పిలుస్తారు. కాబట్టి ఇరాన్ నుండి దుస్తులు లేదా ఆహారం ఏది వచ్చినా ఇక్కడ స్వీకరించబడింది. ఇక్కడికి వచ్చిన మతప్రచారకులు, వ్యాపారులు, హస్తకళాకారులు వంటి ప్రజలు తాజిక్ భాషలో పైరాబంద్, పర్షియన్ భాషలో పైరాహన్ అని పిలువబడే ముందు భాగంలో తెరిచి ఉండే వదులైన దుస్తులను ధరించేవారు. కాశ్మీరీలు వాతావరణానికి తగినట్లుగా ఒక చిన్న మార్పు చేసి దానిని ఉపయోగించడం ప్రారంభించారు. ఆ పైరాహన్ కాశ్మీర్‌లో ఫేరన్‌గా ప్రసిద్ధి చెందింది.

తీవ్రమైన శీతాకాలపు చలి నుండి తమను తాము రక్షించుకోవడానికి కాశ్మీర్‌లోని అన్ని మత, సామాజిక వర్గాల ప్రజలు చిన్న చిన్న మార్పులతో ఫేరన్‌ను ధరిస్తారు. పండిట్ కమ్యూనిటీ సభ్యులు తమ ఫేరన్ ఎడమచేతి భాగాన్ని కాస్త పొడవుగా ఉంచుకునేవారు. తీవ్రమైన చలిలో దీనిని మఫ్లర్‌గా వాడేవారు. దానిపై ఒక కప్పు టీని కూడా ఉంచేవారు. వారి ఫేరన్లకు రెండు వైపులా జేబులు ఉండేవి, ఇతరులకు మాత్రం కుడి వైపున ఒకే జేబు ఉంటుంది. ఫేరన్ ఇకపై కాశ్మీర్ లోయకే పరిమితం కాలేదు. ఫ్యాషన్ ట్రెండ్స్‌కు అనుగుణంగా తయారు చేయబడిన దీని కొత్త డిజైన్లు సరిహద్దులు దాటి పలు దేశాలకు చేరుకున్నాయి. అక్కడ వారు ఎంతో ఉత్సాహంగా ధరిస్తున్నారు. అలా ఫేరన్ ప్రపంచవ్యాప్త ప్రసిద్ధి చెందింది.

ఫేరన్‌ను అమెరికా వంటి దేశాలకు తీసుకెళ్లిన ఘనత పొందిన కాశ్మీరీ ఫ్యాషన్ డిజైనర్ ముఫ్తీ సాదియా హిందుస్తాన్ సమాచార్తో మాట్లాడుతూ.. ఒకప్పుడు లోయలో మాత్రమే ధరించే ఈ దుస్తులు ఇప్పుడు ప్రపంచానికి పరిచయం చేయబడ్డాయి, దీనికి నిరంతరం గిరాకీ పెరుగుతోందని చెప్పారు. ఉత్తర భారతదేశంలో ఫేరన్ రోజురోజుకూ ప్రజాదరణ పొందుతోందని ఆమె చెప్పారు. ఇది కేవలం ఒక ఫ్యాషన్ కోసమే ధరించడం లేదు. ఆకర్షణీయంగా ఉండటమే కాకుండా, ఇది సౌకర్యవంతమైన దుస్తులు. అందుకే ప్రజలు దీనిని ఇష్టపడుతున్నారు.

“ఒకసారి ఒక వ్యక్తి ఫేరన్ ధరించడం ప్రారంభిస్తే, అతను లేదా ఆమె క్రమంగా దానిని కొనుగోలు చేసే రెగ్యులర్ కస్టమర్‌గా మారతారు. వారి స్నేహితులు, పరిచయస్తులు కూడా దీనిని కొనుగోలు చేస్తారు. అందుకే దేశవ్యాప్తంగా, విదేశాల నుండి వివిధ డిజైన్ల ఫేరన్ల కోసం నాకు ఆర్డర్లు వస్తూనే ఉన్నాయి” అని ఆమె చెప్పారు. శ్రీనగర్‌లో హ్యాంగర్స్: ది క్లోసెట్ యజమాని అయిన సాదియా మాట్లాడుతూ, కోట్లు వంటి ఇతర పొడవైన దుస్తులతో పోలిస్తే ఫేరన్ చాలా తేలికగా ఉంటుందని చెప్పారు. ప్రజలు దీనిని ఎంచుకోవడానికి ఇదొక కారణమని తెలిపారు. ఇది కోట్ కంటే చాలా సౌకర్యవంతంగా, మరింత గంభీరంగా ఉంటుందని, ధరించిన వారి వ్యక్తిత్వాన్ని ఇది మరింత పెంచుతుందని ఆమె తెలిపారు.

న్యూఢిల్లీ రాజౌరీ గార్డెన్ ప్రాంతంలో కాశ్మీర్ ఎక్స్‌పో అనే కాశ్మీరీ ఆర్ట్ స్టోర్‌ను నడుపుతున్న మహమ్మద్ యాసీన్ పండిట్ హిందుస్తాన్ సమాచార్తో మాట్లాడుతూ.. ఫేరన్ ప్రపంచవ్యాప్త ప్రసిద్ధి చెందడంలో సోషల్ మీడియా కీలక పాత్ర పోషించిందని చెప్పారు. టెలివిజన్ సీరియళ్లలో కొందరు నటులు దీనిని ధరించడం కూడా దీని ప్రాచుర్యానికి కారణమని ఆయన తెలిపారు. అయితే, మిషన్లతో తయారు చేసిన ఫేరన్లు చేతితో తయారు చేసిన దుస్తుల పేరును కొంతవరకు దెబ్బతీశాయని ఆయన ఆందోళన వ్యక్తం చేశారు. మిషన్లతో చేసిన ఫేరన్లు చేతితో తయారు చేసిన వాటి కంటే చవకగా ఉంటాయని, కానీ చేతితో చేసిన ఫేరన్లకు డిమాండ్ స్థిరంగానే ఉందని ఆయన అన్నారు.

ఇతర రకాల వేడి దుస్తులు విస్తృతంగా అందుబాటులో ఉన్నప్పటికీ ఫేరన్‌కు గిరాకీ తగ్గలేదని సదరు దుకాణదారుడు తెలిపారు. నేను 25 ఏళ్లుగా ఈ వ్యాపారంలో ఉన్నాను. రకరకాల వెచ్చని దుస్తులు అందుబాటులో ఉన్నప్పటికీ, దీనికి గిరాకీ మాత్రమే పెరిగిందని నేను చూశాను. ఎలాంటి తగ్గుదల లేదు” అని ఆయన అన్నారు. “కాశ్మీర్ అందమైన సంస్కృతి లాగే ఫేరన్ కూడా ఒక అందమైన దుస్తులు. దీనిని ఒకసారి ధరించిన వారు తమ వార్డ్‌రోబ్‌లో దీనిని ఒక ముఖ్యమైన భాగంగా చేసుకుంటారు. మతం, కమ్యూనిటీతో సంబంధం లేకుండా ప్రజలు దీనిని ధరిస్తారు” అని ఆయన జోడించారు.

మధ్య బుద్గామ్ జిల్లాలో బాబా ఆర్ట్ గ్యాలరీని నడుపుతున్న యావర్ అలీ బాబా హిందుస్తాన్ సమాచార్తో మాట్లాడుతూ.. కాశ్మీరీ తిల్లా ఫేరన్ అనేది ఇక్కడ ధరించే ప్రత్యేక రకం ఫేరన్ అని చెప్పారు. ఇది వధువు దుస్తులలో ముఖ్యమైన భాగమని తెలిపారు. కొంచెం చవకగా ఉండే మిషన్ మేడ్ తిల్లా ఫేరన్లు కూడా దుకాణాల్లో లభిస్తున్నాయని, అయితే చాలా మంది ఇప్పటికీ చేతితో చేసిన వాటినే కొనుగోలు చేస్తున్నారని ఆయన తెలిపారు. ఆయన ప్రకారం, తిల్లా ఫేరన్ ధర కనీసం రూ. 15,000 ఉంటుంది. కాశ్మీర్‌లో పెళ్లిళ్ల సీజన్ ప్రారంభం కావడంతో దీనికి గిరాకీ పెరుగుతుంది.

హిందూస్తాన్ సమచార్ / Santhosha Laxmi