లాసా/బీజింగ్:, 23 అక్టోబర్ (హి.స.)

టిబెట్‌ను గురువారం రాత్రి సంభవించిన భయంకర భూకంపం తీవ్రంగా కుదిపేసింది. రిక్టర్ స్కేలుపై 7.0 తీవ్రతతో వచ్చిన ఈ శక్తివంతమైన భూకంపం కారణంగా కనీసం 16 మంది ప్రాణాలు కోల్పోగా, 32 మందికి పైగా తీవ్రంగా గాయపడ్డారు. భూ ప్రకంపనల ధాటికి 300కు పైగా ఇళ్లు క్షణాల్లో కుప్పకూలడంతో ప్రభావిత ప్రాంతాల్లో సహాయక, రక్షణ చర్యలను అధికారులు ముమ్మరం చేశారు.

మాధ్యమాల కథనాల ప్రకారం గురువారం రాత్రి సుమారు 10:33 గంటల సమయంలో ఈ విపత్తు సంభవించింది. శుక్రవారం తెల్లవారుజామున 2:25 గంటల నాటికి అందుబాటులోకి వచ్చిన ప్రాథమిక సమాచారం మేరకు గాయపడిన వారిలో 11 మంది పరిస్థితి అత్యంత విషమంగా ఉంది. మిగిలిన 21 మంది స్వల్ప గాయాలతో బయటపడ్డారు. ఘటనా స్థలంలో ఉన్న ఉన్నతాధికారులు నష్ట తీవ్రతను సమీక్షిస్తూ బాధితులకు అవసరమైన తక్షణ సాయం అందిస్తున్నారు.

అమెరికా జియోలాజికల్ సర్వే (USGS) ప్రకారం నాగ్వ్ (Nagqu) నగరానికి ఈశాన్యంగా 190 కిలోమీటర్ల దూరంలో, ప్రాంతీయ రాజధాని లాసాకు ఈశాన్యంగా 390 కిలోమీటర్ల దూరంలో ఉన్న పర్వత ప్రాంతంలో భూకంప కేంద్రం నమోదైంది. భూమి లోపల భూకంప కేంద్రం 10 కిలోమీటర్ల లోతులో కేంద్రీకృతమైంది.

ప్రాంతీయ ప్రభావం, అత్యవసర స్పందన

స్థానిక అధికారులు తెలిపిన వివరాల ప్రకారం బచేన్ (Baqên) కౌంటీలోని మారు టౌన్‌షిప్‌లో భూకంప కేంద్రం ఉంది. భూమి కంపించిన తీవ్రతకు టౌన్‌షిప్ కార్యాలయ భవనం గోడలకు పెద్ద ఎత్తున పగుళ్లు వచ్చాయని స్థానిక ఉప అధిపతి లహావాంగ్ దాగో తెలిపారు. ఈ ప్రకంపనల ధాటికి కౌంటీ ప్రధాన కార్యాలయం పరిధిలో విద్యుత్ సరఫరా, టెలికమ్యూనికేషన్ వ్యవస్థలు పూర్తిగా నిలిచిపోయాయి.

ప్రమాదం వెలుగుచూసిన వెంటనే ప్రభావిత ప్రాంతంలో అధికారులు లెవెల్-II అత్యవసర పరిస్థితిని ప్రకటించారు. బాధితులను కాపాడేందుకు భూకంప కేంద్రం సమీపంలో ఉన్న ప్రాంతాలకు 300 మందికి పైగా పోలీసులను వెంటనే తరలించారు. వీరితో పాటు ప్రాంతీయ ఫైర్, రెస్క్యూ విభాగాలకు చెందిన 347 మంది సిబ్బందిని రక్షణ చర్యల కోసం రంగంలోకి దించారు. శిథిలాల కింద చిక్కుకున్న వారిని వెలికితీసేందుకు, గాయపడిన వారికి ప్రాథమిక వైద్యం అందించేందుకు సహాయక బృందాలు తీవ్రంగా శ్రమిస్తున్నాయి.

ప్రకృతి విపత్తుల ముప్పు

టిబెట్, దాని పరిసర హిమాలయ ప్రాంతాలలో భూకంపాలు సంభవించడం సాధారణమే. అంతకుముందు 2025 జనవరిలో టిబెట్‌లోని టింగ్రి కౌంటీలో 6.8 తీవ్రతతో వచ్చిన భూకంపం వల్ల 120 మందికి పైగా మరణించగా, వందలాది మంది గాయపడ్డారు. అలాగే 2010లో పరిసర ప్రాంతమైన ఛింగ్‌హై ప్రావిన్స్‌లోని యుషు ప్రాంతంలో 7.1 తీవ్రతతో సంభవించిన తీవ్ర భూకంపంలో 2,698 మంది ప్రాణాలు కోల్పోగా, 300 మంది దాకా గల్లంతయ్యారు.

ఇటీవల సంభవించిన వరదలు, కొండచరియల విపత్తు నుంచి టిబెట్ ఇంకా పూర్తిగా కోలుకోకముందే ఈ భూకంపం రావడం తీవ్ర దిగ్భ్రాంతికి గురిచేసింది. వివరాల ప్రకారం 2026 ఆగస్టు 26న నేపాల్-టిబెట్ సరిహద్దు వద్ద మంచు, రాళ్లు జారడంతో అకస్మాత్తుగా వరదలు వచ్చి అనేక ఇళ్లు, రహదారులు, వారధులు కొట్టుకుపోయాయి. అనేక జలవిద్యుత్ ప్రాజెక్టులు కూడా తీవ్రంగా దెబ్బతిన్నాయి. ఈ వరుస ప్రకృతి విపత్తులు ఈ ప్రాంత పర్యావరణ భద్రతపై మళ్లీ ఆందోళనలను రేకెత్తిస్తున్నాయి.

---------------

హిందూస్తాన్ సమచార్ / Santhosha Laxmi