హైదరాబాద్ , 24 అక్టోబర్ (హి.స.)

బంగాళాఖాతంలో ఏర్పడిన అల్పపీడన వ్యవస్థ బలపడే అవకాశాల నేపథ్యంలో తెలంగాణలో ఈ నెల చివర్లో వర్షాలు కురిసే అవకాశం ఉందని భారత వాతావరణ శాఖ అంచనా వేసింది.

అక్టోబర్ 27 నుంచి కొన్ని ప్రాంతాల్లో తేలికపాటి నుంచి మోస్తరు వర్షాలు కురిసే అవకాశముండగా, అక్టోబర్ 28 నుంచి 29 మధ్య తూర్పు తెలంగాణ జిల్లాల్లో ఉరుములు, మెరుపులు, ఈదురుగాలులతో కూడిన వర్షాలు పడవచ్చని అధికారులు పేర్కొన్నారు.

జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం జిల్లాలపై ప్రత్యేకంగా దృష్టి సారించాల్సిన అవసరం ఉందని వాతావరణ అంచనాలు సూచిస్తున్నాయి. కొన్ని ప్రాంతాల్లో గంటకు 30 నుంచి 40 కిలోమీటర్ల వేగంతో గాలులు వీచే అవకాశముంది.

అయితే అల్పపీడనం బలపడే తీరు, దాని ప్రయాణ మార్గం ఆధారంగా వర్షాల తీవ్రతలో మార్పులు ఉండవచ్చు. అక్టోబర్ 27 వరకు రాష్ట్రంలోని చాలా ప్రాంతాల్లో పొడి వాతావరణం కొనసాగవచ్చని వాతావరణ శాఖ అంచనా వేయడం గమనార్హం. అంటే రాష్ట్రవ్యాప్తంగా ఒకేసారి భారీ వర్షాలు కురుస్తాయని భావించకూడదు. జిల్లాల వారీగా వాతావరణ పరిస్థితులు భిన్నంగా ఉండవచ్చు. ప్రజలు అధికారిక వాతావరణ హెచ్చరికలను గమనించడం అవసరం.

---------------

హిందూస్తాన్ సమచార్ / పుట్టా సుమన్