శ్రీనగర్:, 28 అక్టోబర్ (హి.స.)

లోయలో తీవ్ర కలకలం రేపిన బెదిరింపు పోస్టర్లు మరియు లేఖల ఆన్‌లైన్ ప్రచార వ్యవహారంలో జమ్మూ కాశ్మీర్ పోలీసులు కఠిన చర్యలు తీసుకున్నారు. ఈ కేసులో హర్యానాకు చెందిన కాశ్మీరీ పండిట్ కార్యకర్త రాకేష్ హందూను పోలీసులు అరెస్ట్ చేశారు. నిందితుడిని కోర్టులో హాజరుపరచగా, విచారణ నిమిత్తం ఐదు రోజుల పాటు పోలీసు కస్టడీకి అనుమతి లభించింది.

లోయలో ప్రధాన మంత్రి ప్రత్యేక ఉపాధి ప్యాకేజి కింద ఉద్యోగాలు చేస్తున్న కాశ్మీరీ పండిట్ ఉద్యోగులను లక్ష్యంగా చేసుకుని కొద్దికాలం క్రితం కొన్ని బెదిరింపు లేఖలు సామాజిక మాధ్యమాల్లో వైరల్ అయ్యాయి. ఈ పోస్టర్ల కారణంగా మైనారిటీ ఉద్యోగుల్లో భయాందోళనలు వ్యక్తమయ్యాయి. దీనిపై తోటి కాశ్మీరీ పండిట్ ఉద్యోగి ఫిర్యాదు చేయడంతో పోలీసులు సైబర్ క్రైమ్ కింద కేసు నమోదు చేసి దర్యాప్తు చేపట్టారు.

దర్యాప్తులో భాగంగా నిందితుడు రాకేష్ హందూ ఆన్‌లైన్ ద్వారా బెదిరింపు సామాగ్రిని సవరించి ప్రచారం చేసినట్లు పోలీసుల ప్రాథమిక విచారణలో తేలింది. పోలీసుల నుంచి పలుమార్లు నోటీసులు అందినప్పటికీ విచారణకు హాజరుకాకపోవడంతో హర్యానాలోని ఫరీదాబాద్‌లో ఉన్న ఆయనను పోలీసులు అదుపులోకి తీసుకున్నారు. ఆయన వద్ద ఉన్న మొబైల్ ఫోన్లు, డిజిటల్ పరికరాలను సీజ్ చేసి ఫోరెన్సిక్ పరీక్షలకు పంపించారు.

మరోవైపు ఈ అరెస్ట్ పట్ల నిందితుడి కుటుంబ సభ్యులు, కొందరు సంఘ నాయకులు ఆందోళన వ్యక్తం చేశారు. రాకేష్ హందూ ఎప్పుడూ ఉగ్రవాద బెదిరింపులకు వ్యతిరేకంగా, నిష్పక్షపాత విచారణ జరగాలని గళం వినిపించారని వారు తెలిపారు. కాగా, ఈ బెదిరింపు పోస్టర్ల వెనుక అసలు కుట్ర కోణాన్ని వెలికితీసేందుకు, ఉగ్రవాద సంబంధిత చట్టాల కింద పోలీసులు దర్యాప్తును మరింత ముమ్మరం చేశారు.

---------------

హిందూస్తాన్ సమచార్ / Santhosha Laxmi