జమ్మూ కాశ్మీర్‌, 04 అక్టోబర్ (హి.స.)

జమ్మూ కాశ్మీర్‌లో భద్రతా బలగాలు జరిపిన మెరుపు దాడిలో మరణించిన మోస్ట్ వాంటెడ్ లష్కరే తోయిబా (LeT) ఉగ్రవాద కమాండర్ హషిమ్ మూసా అలియాస్ మొహమ్మద్ ఆసిఫ్‌కు సంబంధించిన ఒక ఆసక్తికర విషయం వెలుగులోకి వచ్చింది. పాకిస్థాన్ ఆర్మీకి చెందిన ఎలైట్ ఎస్‌ఎస్‌జీ మాజీ కమాండో అయిన మూసా.. గతంలో జరిగిన ఎన్‌కౌంటర్‌లో తగిలిన బుల్లెట్ గాయాలను మాన్పుకోవడానికి అటవీ ప్రాంతంలో ఆయుర్వేద పద్ధతిని ఆశ్రయించాడు.

వైద్యుల సహాయం అందే అవకాశం లేకపోవడంతో, అడవుల్లో తలదాచుకున్న సమయంలో గాయాలు త్వరగా మానడానికి, ఇన్ఫెక్షన్ సోకకుండా స్వచ్ఛమైన తేనెను (Ayurvedic Honey Remedy) పూతగా ఉపయోగించినట్లు నిఘా వర్గాలు మరియు అధికారులు వెల్లడించారు. 2025 పహల్గామ్ ఉగ్రదాడితో పాటు పలు దుర్ఘటనలకు సూత్రధారి అయిన మూసా.. ఉగ్రవాద కార్యకలాపాల కోసం కశ్మీర్ అడవుల్లో తిరుగుతున్న సమయంలో ఈ వినూత్న పద్ధతిని అనుసరించాడు. సెప్టెంబర్ మొదటి వారంలో మరొక ఉగ్రవాది యాసిర్ మరణించిన తర్వాత లభించిన ఫోన్‌లో, మూసా గాయాలకు తేనె రాసుకున్న ఫోటోలు బయటపడటంతో ఈ విషయం వెలుగులోకి వచ్చింది.

---------------

హిందూస్తాన్ సమచార్ / Santhosha Laxmi