అమరావతి , 09 అక్టోబర్ (హి.స.)ఆంధ్రప్రదేశ్ రాష్ట్ర రోడ్డు రవాణా సంస్థ (APSRTC) లో ఎంతో కాలంగా ఎదురుచూస్తున్న గుర్తింపు సంఘం ఎన్నికల పోలింగ్ ఈరోజు ఉదయం అత్యంత ప్రతిష్టాత్మకంగా ప్రారంభమైంది. రాష్ట్రవ్యాప్తంగా ఉన్న అన్ని డిపోలు, రీజనల్ ఆఫీసుల్లో కార్మికులు తమ ఓటు హక్కును వినియోగించుకోవడానికి భారీ సంఖ్యలో తరలివచ్చారు. ఉదయం నుంచే పోలింగ్ కేంద్రాల వద్ద కార్మికుల క్యూ లైన్లు కనిపించాయి.

ఈ ఎన్నికల్లో ప్రధాన కార్మిక సంఘాలు పోటీ పడుతుండటంతో డిపోల వద్ద ఉత్కంఠ వాతావరణం నెలకొంది. కార్మికుల హక్కుల రక్షణ, పీఆర్సీ అమలు, భత్యాల చెల్లింపు, మరియు సంస్థ ప్రైవేటీకరణ కాకుండా ప్రభుత్వ పరిధిలోనే బలోపేతం చేయడం వంటి అంశాలను ప్రధాన ఎజెండాగా పెట్టుకుని సంఘాలు ప్రచారం నిర్వహించాయి. శాంతిభద్రతల సమస్యలు తలెత్తకుండా పోలీస్ యంత్రాంగం గట్టి భద్రతను ఏర్పాటు చేసింది. సాయంత్రం వరకు పోలింగ్ ముగిసిన వెంటనే ఓట్ల లెక్కింపు చేపట్టి, అధికారికంగా విజేతను ప్రకటించేందుకు అధికారులు ఏర్పాట్లు పూర్తి చేశారు.

---------------

హిందూస్తాన్ సమచార్ / పుట్టా సుమన్