విశాఖపట్నం , 11 నవంబర్ (హి.స.)
విశాఖపట్నం వేదికగా జరగనున్న అంతర్జాతీయ పెట్టుబడుల సదస్సుకు అన్ని ఏర్పాట్లు పూర్తయ్యాయి. ఈ నెల 12, 13 తేదీల్లో 31వ సీఐఐ భాగస్వామ్య సదస్సు–2026 నిర్వహించేందుకు ఆంధ్రప్రదేశ్ ప్రభుత్వం సిద్ధమైంది. భారత పరిశ్రమల సమాఖ్య (సీఐఐ), రాష్ట్ర ప్రభుత్వం సంయుక్తంగా ఈ ప్రతిష్ఠాత్మక కార్యక్రమాన్ని నిర్వహించనున్నాయి.
ఈ సదస్సుకు ప్రపంచంలోని పలు దేశాల నుంచి ప్రముఖ పారిశ్రామికవేత్తలు, పెట్టుబడిదారులు, ప్రభుత్వ ప్రతినిధులు హాజరుకానున్నారు. వివిధ రంగాల్లో పెట్టుబడుల అవకాశాలు, పారిశ్రామిక అభివృద్ధి, అంతర్జాతీయ భాగస్వామ్యాలు, ఆధునిక సాంకేతిక పరిజ్ఞానం వంటి అంశాలపై చర్చలు జరగనున్నాయి. రాష్ట్రంలో కొత్త పరిశ్రమల ఏర్పాటుకు అవసరమైన అవకాశాలను అంతర్జాతీయ ప్రతినిధులకు వివరించేందుకు ప్రభుత్వం ప్రత్యేక ప్రణాళికలు సిద్ధం చేసింది.
ముఖ్యంగా విశాఖపట్నాన్ని పారిశ్రామిక, వాణిజ్య కేంద్రంగా అభివృద్ధి చేయడంతో పాటు రాష్ట్రానికి భారీ పెట్టుబడులను ఆకర్షించడమే ఈ సదస్సు ప్రధాన ఉద్దేశంగా కనిపిస్తోంది. వివిధ సంస్థలతో అవగాహన ఒప్పందాలు కుదుర్చుకునే అవకాశముంది. ఈ కార్యక్రమం ద్వారా రాష్ట్రంలో ఉపాధి అవకాశాలు పెరగడంతో పాటు పారిశ్రామిక రంగానికి కొత్త ఊపు వస్తుందని ప్రభుత్వం ఆశిస్తోంది. అంతర్జాతీయ స్థాయి ప్రతినిధుల రాకతో విశాఖలో సందడి నెలకొంది.
---------------
హిందూస్తాన్ సమచార్ / పుట్టా సుమన్
