
న్యూఢిల్లీ, నవంబర్ 22(హి.స): బీజేపీ రాజ్యసభ సభ్యుడు డాక్టర్ రాంరావ్ సఖారామ్ వడ్కుటే (72) మరణంపై రాష్ట్రపతి ద్రౌపది ముర్ము, ఉపరాష్ట్రపతి సి.పి. రాధాకృష్ణన్, కేంద్ర పార్లమెంటరీ వ్యవహారాలు మరియు మైనారిటీ వ్యవహారాల మంత్రి కిరెన్ రిజిజు సహా పలువురు ప్రముఖులు ఆదివారం తీవ్ర సంతాపం వ్యక్తం చేశారు. ఛాతీ నొప్పితో ఆసుపత్రిలో చేరిన ఆయన గుండెపోటుతో చికిత్స పొందుతూ తుదిశ్వాస విడిచారు.
రాష్ట్రపతి ద్రౌపది ముర్ము ‘ఎక్స్’ (X) వేదికగా సంతాపం తెలుపుతూ, సఖారామ్ వడ్కుటే ప్రజా సంక్షేమానికి అంకితమైన నాయకుడు. మహారాష్ట్రతో పాటు దేశాభివృద్ధికి ఆయన విలువైన సేవలు అందించారు. ప్రజా జీవితానికి, ప్రజలకు ఆయన చేసిన సేవలు ఎప్పటికీ గుర్తుండిపోతాయి. ఆయన కుటుంబ సభ్యులు, అభిమానులు, శ్రేయోభిలాషులకు నా ప్రగాఢ సానుభూతి తెలియజేస్తున్నాను. ఈ క్లిష్ట సమయాన్ని తట్టుకునే శక్తిని భగవంతుడు వారికి ప్రసాదించాలి అని పేర్కొన్నారు.
ఎంపీ డాక్టర్ రాంరావ్ సఖారామ్ వడ్కుటే మరణం తీవ్ర విచారకరమని లోక్సభ స్పీకర్ ఓం బిర్లా అన్నారు. ఆయన ఆత్మకు శాంతి చేకూరాలని, ఈ తీరని లోటును తట్టుకునే ధైర్యాన్ని కుటుంబానికి ఇవ్వాలని ప్రార్థిస్తూ ప్రగాఢ సానుభూతి తెలిపారు. కేంద్ర మంత్రి కిరెన్ రిజిజు కూడా వడ్కుటే కుటుంబ సభ్యులు, సన్నిహితులకు తన సంతాపాన్ని తెలియజేస్తూ, ఆయన ఆత్మకు శాంతి కలగాలని ఆకాంక్షించారు.
ఎనిమిది నెలల క్రితమే బీజేపీ తరఫున రాంరావ్ వడ్కుటే రాజ్యసభ సభ్యుడిగా ఎన్నికయ్యారు. అంతకుముందు ఆయన ధంగర్ సమాజ అభ్యున్నతి కోసం ఎన్నో ఏళ్లుగా విశేష కృషి చేశారు. జిల్లా స్థాయిలో పలు కీలక బాధ్యతలు నిర్వర్తించడంతో పాటు, మహారాష్ట్ర గొర్రెలు మరియు మేకల అభివృద్ధి సంస్థ ఛైర్మన్గా కూడా ఆయన సేవలు అందించారు.
హిందూస్తాన్ సమచార్ / Santhosha Laxmi