, విశాఖపట్నం 22 మార్చి (హి.స.)

: విశాఖకు చెందిన భూపతిరాజు అన్మిష్ వర్మ ప్రపంచంలోని ఏడు అగ్నిపర్వత శిఖరాలను అత్యంత వేగంగా అధిరోహించిన పురుషుడిగా గిన్నిస్ వరల్డ్ రికార్డు సాధించారు. గతంలో 200 రోజుల ప్రపంచ రికార్డు ఉండగా దాన్ని అన్మిష్ కేవలం 92 రోజుల 4 గంటల్లోనే చేరుకొని రికార్డు నెలకొల్పారు. ఈ ఘనతను గిన్నిస్ వరల్డ్ రికార్డు ప్రతినిధులు అధికారికంగా గుర్తించి ఇటీవల దిల్లీలో జరిగిన కార్యక్రమంలో అవార్డు ప్రదానం చేశారు. ఈ సందర్భంగా ఆయన ‘ఈనాడు’తో శనివారం ప్రత్యేకంగా మాట్లాడారు.

‘సాహసాలు చేయడమంటే నాకు ఆసక్తి. అందులో భాగంగానే ప్రపంచంలో ఎత్తయిన పర్వతాలను అధిరోహించా. అత్యంత కఠినమైన దక్షిణ ధ్రువానికి చేరుకున్నా. ఈ ప్రయాణాన్ని కొనసాగిస్తూ అగ్ని పర్వతాలను అధిరోహించాలనే లక్ష్యాన్ని ఏర్పాటు చేసుకున్నా. గత ఏడాది అక్టోబర్ 23న రష్యాలోని ఎల్బ్రస్ పర్వత అధిరోహణతో మొదలుపెట్టి ఆ తర్వాత అర్జెంటీనాలోని ఒజాస్ డెల్ సలాడో, టాంజానియాలోని కిలిమంజారో, మెక్సికోలోని పికో డె ఒరిజాబా, ఇరాన్లోని దమావంద్, పపువా న్యూ గినీలోని గిలూవే పర్వతాలను అధిరోహించా. ఈ ఏడాది జనవరి 23తో అంటార్కిటికాలోని సిడ్లీ అగ్నిపర్వతాన్ని ఎక్కడం ద్వారా నా ప్రయాణం పూర్తయింది. ముఖ్యంగా సిడ్లీ పర్వతానికి చేరుకోవడానికి ఎన్నో సవాళ్లను ఎదుర్కోవాల్సి వచ్చింది. ఓ దశలో చాలా దూరం వెళ్లాక గైడ్కు అనారోగ్యం కలిగింది.

దాంతో కిందికి వచ్చి మళ్లీ పైకి వెళ్లాం. ఇందుకు పది రోజుల సమయం పట్టింది. ఇలాంటి అనుభవాలు ఈ ప్రయాణంలో చాలా ఉన్నాయి. ఈ ప్రక్రియలో మైనస్ 60 డిగ్రీల మంచులో ప్రమాదకరంగా.. తిండి లేకుండా ముందుకు సాగాం. వాస్తవానికి ఏడు పర్వతాలను 60 రోజుల్లో చేరుకోవాలనేది లక్ష్యం. వాతావరణం, ఇతర సమస్యల కారణంగా 92 రోజులు పట్టింది’ అని అన్మిష్ పేర్కొన్నారు.

---------------

హిందూస్తాన్ సమచార్ / నిత్తల రాజీవ