న్యూఢిల్లీ, 19 జూలై (హి.స.)

: ప్రముఖ విద్యా సంస్కర్త, పర్యావరణ కార్యకర్త సోనమ్ వాంగ్చుక్ జూలై 20 (సోమవారం) నాడు నిర్వహించ తలపెట్టిన పార్లమెంట్ మార్చ్‌ను ఉద్దేశించి సంచలన వ్యాఖ్యలు చేశారు. ఢిల్లీలోని సఫ్దర్‌జంగ్ ఆసుపత్రి నుండి తన భార్య గీతాంజలి జె. ఆంగ్మో ద్వారా ఆయన ఒక చేతిరాత లేఖను సామాజిక మాధ్యమం ఎక్స్ (X) లో పంచుకున్నారు. ఈ లేఖలో జూలై 20 నాటి 'చలో సంసద్' మార్చ్‌ను భారతదేశపు రెండవ స్వాతంత్ర్య ఉద్యమం (Azadi Ka Doosra Andolan) గా ఆయన పేర్కొన్నారు. దేశానికి ప్రస్తుతం పరీక్షల పేపర్ లీకేజీల వంటి అక్రమాల నుండి విముక్తి (Freedom from Injustice) మరియు పౌరులపై సాగుతున్న అణచివేత చర్యల నుండి విముక్తి (Freedom from Fear) కావాలని ఆయన పిలుపునిచ్చారు. ఈ బృహత్తర ఉద్యమ ప్రదర్శనను భారీ స్థాయిలో విజయవంతం చేయాలని దేశ ప్రజలకు, విద్యార్థులకు ఆయన విజ్ఞప్తి చేశారు.నీట్ (NEET) పరీక్షా అక్రమాలకు వ్యతిరేకంగా, విద్యాశాఖ మంత్రి ధర్మేంద్ర ప్రధాన్ రాజీనామా డిమాండ్‌తో జంతర్ మంతర్ వద్ద కాక్రోచ్ జనతా పార్టీ (CJP) ఆధ్వర్యంలో జరుగుతున్న ఆందోళనల్లో వాంగ్చుక్ జూన్ 28 నుండి నిరవధిక నిరాహార దీక్షకు కూర్చున్నారు. అయితే, ఆయన ఆరోగ్యం క్షీణించడంతో 21వ రోజున (శనివారం) ఢిల్లీ పోలీసులు హైకోర్టు ఆదేశాల ప్రకారం ఆయనను బలవంతంగా సఫ్దర్‌జంగ్ ఆసుపత్రికి తరలించారు. దీనిపై వాంగ్చుక్ స్పందిస్తూ, తనను చట్టవిరుద్ధంగా ఆసుపత్రిలో నిర్బంధించారని (illegal detention) ఆరోపించారు. ఆసుపత్రిలో ఉన్నప్పటికీ ఉప్పు నీరు మాత్రమే తీసుకుంటూ తన దీక్షను కొనసాగిస్తున్నట్లు ఆయన భార్య వెల్లడించారు. వాంగ్చుక్‌ను నిర్బంధించినప్పటికీ, జూలై 20న పార్లమెంట్ వర్షాకాల సమావేశాల ప్రారంభం సందర్భంగా ప్లాన్ చేసిన శాంతియుత మార్చ్ యథావిధిగా కొనసాగుతుందని సిజెపి (CJP) వ్యవస్థాపకుడు అభిజీత్ దిప్కే స్పష్టం చేశారు

---------------

హిందూస్తాన్ సమచార్ / Santhosha Laxmi