లక్నో, 06 జూలై (హి.స.)

భారతీయ జనసంఘ్ వ్యవస్థాపకుడు డాక్టర్ శ్యామా ప్రసాద్ ముఖర్జీ 125వ జయంతి సందర్భంగా ఉత్తరప్రదేశ్ ముఖ్యమంత్రి యోగి ఆదిత్యనాథ్ ఆయనకు ఘనంగా నివాళులర్పించారు. దేశ విభజన సమయంలో డాక్టర్ ముఖర్జీ చూపిన చొరవ, పోరాటం వల్లే బెంగాల్‌ పాకిస్థాన్ రక్తపాత కోరల్లోకి వెళ్లకుండా రక్షించబడిందని సీఎం యోగి కొనియాడారు. ముఖర్జీ సకాలంలో స్పందించి ఉండకపోతే, నేటి పశ్చిమ బెంగాల్ ప్రాంతం మొత్తం పాకిస్థాన్‌లో కలిసిపోయి ఉండేదని ఆయన గుర్తుచేశారు.స్వతంత్ర భారతదేశంలో జమ్మూ కాశ్మీర్ పూర్తి విలీనం కోసం మరియు 'ఒకే దేశంలో రెండు రాజ్యాంగాలు, ఇద్దరు ప్రధానులు, రెండు జెండాలు నడవవు' అంటూ ముఖర్జీ సాగించిన ఉద్యమాన్ని సీఎం యోగి ఈ సందర్భంగా స్మరించుకున్నారు. నాడు కాశ్మీర్ సరిహద్దుల్లో ఆయన చేసిన ప్రాణత్యాగం వృధా కాలేదని, ప్రధానమంత్రి నరేంద్ర మోదీ నేతృత్వంలో ఆర్టికల్ 370 రద్దుతో ముఖర్జీ కల సాకారమైందని స్పష్టం చేశారు. దేశ సమగ్రత, ఐక్యత కోసం ముఖర్జీ చూపిన మార్గం ఎప్పటికీ ఆదర్శనీయమని యోగి ఆదిత్యనాథ్ పేర్కొన్నారు.

---------------

హిందూస్తాన్ సమచార్ / Santhosha Laxmi