నాగపూర్, 01 ఆగస్టు (హి.స.)

రామకృష్ణ పరమహంస 'శివ భావే జీవ సేవ' (శివుడికి పూజ చేసినట్లే జీవులకు సేవ) అనే ఆదర్శాన్ని పాటిస్తూ స్వామి వివేకానంద మెడికల్ మిషన్ ఆసుపత్రి గత 53 ఏళ్లుగా సేవ, సమర్పణ, మానవత్వానికి నిదర్శనంగా నిలుస్తోంది. ఈ ఆసుపత్రి పేదలకు, అవసరంలో ఉన్న రోగులకు అందుబాటు ధరలలో ఆధునిక వైద్య సౌకర్యాలను అందిస్తోంది.

గోశాల నుండి ప్రారంభమైన సేవ, నేడు 100 పడకల సూపర్ స్పెషాలిటీ ఆసుపత్రిగా

1974లో రాష్ట్రీయ స్వయంసేవక్ సంఘ్ మూడో సర్ సంఘచాలక్ బాలాసాహెబ్ దేవరస్ స్ఫూర్తి, ప్రయత్నాలతో వివేకానంద మెడికల్ మిషన్ మొదలైంది. ఆ రోజుల్లో ఖాప్రీకి చెందిన ఈ ప్రాంతం దాదాపు అడవిలా ఉండేది. ఇక్కడ సంఘ్ శిక్షణ తరగతులు నిర్వహించేవారు. ఈ రోజు ఆసుపత్రి పెద్ద భవనం ఉన్న చోట ఒకప్పుడు గోశాల ఉండేది.

బాలాసాహెబ్ దేవరస్ చుట్టుపక్కల ఉన్న దాదాపు 150 గ్రామాల ప్రజలకు మెరుగైన ఆరోగ్య సౌకర్యాలను అందించాలని కలలు కన్నారు. దీని బాధ్యతను ప్రసిద్ధ డాక్టర్ నానాసాహెబ్ సాల్పేకర్ కు అప్పగించారు. ప్రారంభంలో వారానికి కేవలం ఒక్క రోజు మాత్రమే ఓపీడీ నడిచేది. డాక్టర్లకు లభించే శాంపిల్ మందులను రోగులకు ఉచితంగా పంచేవారు. కాలక్రమేణా రోగుల సంఖ్య పెరిగి, వారపు ఓపీడీ ప్రతిరోజూ నడవడం ప్రారంభమైంది. ప్రారంభంలో కేవలం కంటి వైద్యంతో మొదలైన ఈ సేవ నేడు దాదాపు అన్ని ప్రధాన వ్యాధుల చికిత్సకు కేంద్రంగా మారింది.

అన్ని ఆధునిక వైద్య సౌకర్యాలు నేడు అందుబాటులో ఉన్నాయి : డాక్టర్ దిలీప్

వివేకానంద మెడికల్ మిషన్ అధ్యక్షుడు డాక్టర్ దిలీప్ గుప్తా తెలిపిన వివరాల ప్రకారం, గోశాల నుండి ప్రారంభమైన ఈ ఆసుపత్రి నేడు 100 పడకల ఆధునిక సూపర్ స్పెషాలిటీ ఆసుపత్రిగా మారింది. ఇక్కడ లాప్రోస్కోపిక్ సర్జరీ, న్యూరో సర్జరీ, జాయింట్ రిప్లేస్మెంట్, వెన్నుముక చికిత్స, ఫిజియోథెరపీ, లేజర్ పరిజ్ఞానంతో వెరికోస్ వేన్స్ చికిత్స, సీటీ స్కాన్, డయాలసిస్, పిల్లల గుండె శస్త్రచికిత్స, యాంజియోగ్రఫీ, యాంజియోప్లాస్టీ, స్త్రీల ఆరోగ్య సమస్యలు, నేత్ర వైద్యంతో సహా అనేక ఆధునిక వైద్య సౌకర్యాలు అందుబాటులో ఉన్నాయి. ఆసుపత్రి జాతీయ రహదారిపై ఉండటం వల్ల రోడ్డు ప్రమాదాలలో గాయపడిన రోగులను ముందుగా ఇక్కడికే తీసుకువస్తారని ఆయన తెలిపారు. ఈ అవసరాన్ని దృష్టిలో ఉంచుకుని ఆసుపత్రిలో 100 పడకలతో పాటు 11 ఐసీయూ పడకలను కూడా నిర్వహిస్తున్నారు. ఇది కాకుండా ఇక్కడ నర్సింగ్ శిక్షణ కూడా ఇస్తున్నారు. ప్రస్తుతం రెండేళ్ల కోర్సులో 40 మంది విద్యార్థినులు శిక్షణ పొందుతున్నారు.

ప్రభుత్వ పథకాల కింద పేదలకు ఉచిత చికిత్స : మెడికల్ సూపరింటెండెంట్

ఆసుపత్రి మెడికల్ సూపరింటెండెంట్ డాక్టర్ మీనాక్షి ఖడక్కర్ మాట్లాడుతూ, ఆసుపత్రిలో ఈఎన్టీ, ఆర్థోపెడిక్స్, నేత్ర రోగాలు, గుండె జబ్బులు, స్త్రీల ఆరోగ్య సమస్యలతో సహా దాదాపు అన్ని ప్రధాన వైద్య సేవలు ఒకే ప్రాంగణంలో అందుబాటులో ఉన్నాయని చెప్పారు. కేంద్ర, రాష్ట్ర ప్రభుత్వాల వివిధ ఆరోగ్య పథకాల కింద పేద రోగులకు ఉచిత చికిత్స కూడా అందిస్తున్నారు. నిరంతరం పెరుగుతున్న వైద్య ఖర్చుల మధ్య ఈ ఆసుపత్రి వేలాది కుటుంబాలకు పెద్ద ఊరటగా నిలుస్తోందని ఆమె చెప్పారు.

ప్రజల సహకారంతో నిలబడిన ఈ సేవా సంస్థ

వివేకానంద మెడికల్ మిషన్ ప్రయాణం సమాజ సహకారం, స్వయంసేవకుల సమర్పణకు గొప్ప ఉదాహరణ అని డాక్టర్ దిలీప్ గుప్తా తెలిపారు. రాష్ట్రీయ స్వయంసేవక్ సంఘ్ స్వయంసేవకులు చేసిన నిధి సేకరణతో పాటు, ఎప్పటికప్పుడు సమాజం, వివిధ సంస్థల సహకారంతో ఆసుపత్రి నిరంతరం అభివృద్ధి చెందింది. ఆసుపత్రి సేవా భావనకు ప్రభావితమై విదేశీ సంస్థలు కూడా సహకరించాయి. జపాన్ ప్రభుత్వం ఆసుపత్రికి అత్యాధునిక న్యూరో సర్జరీ పరికరాలను అందించింది. దీనివల్ల సంక్లిష్టమైన మెదడు సంబంధిత చికిత్సలలో పెద్ద సౌకర్యం లభించింది. బ్రహ్మోస్ సంస్థ తరఫున పిల్లల కోసం ఆధునిక వెంటిలేటర్ అందించారు. ప్రస్తుతం ఆసుపత్రిలో దాదాపు అన్ని ప్రధాన సూపర్ స్పెషాలిటీ సేవలు నడుస్తున్నాయి.

ఇప్పుడు 200 పడకల అత్యాధునిక ఆసుపత్రికి సన్నాహాలు

భవిష్యత్ ప్రణాళికల గురించి చెబుతూ డాక్టర్ గుప్తా, ప్రస్తుతం ఉన్న భవనానికి ఆనుకుని ఉన్న స్థలంలో 200 పడకల కొత్త అత్యాధునిక ఆసుపత్రి నిర్మాణ ప్రణాళికపై పని జరుగుతోందని తెలిపారు. నిర్మించబోయే 11 అంతస్తుల భవనంలో 60 ఐసీయూ పడకలు, తొమ్మిది ఆధునిక ఆపరేషన్ థియేటర్లు, రోబోటిక్ సర్జరీ యూనిట్ ఏర్పాటు చేస్తారు. దీనివల్ల విదర్భతో సహా చుట్టుపక్కల రాష్ట్రాల రోగులకు కూడా ఉన్నత స్థాయి వైద్య సౌకర్యాలు అందుబాటులోకి వస్తాయని ఆయన చెప్పారు. పేదలకు తక్కువ ఖర్చుతో మెరుగైన చికిత్స అందించాలనే ఉద్దేశంతో బాలాసాహెబ్ దేవరస్ ఏ కలనైతే కన్నారో, స్వామి వివేకానంద మెడికల్ మిషన్ ఆ సేవా సంకల్పాన్ని ముందుకు తీసుకెళ్తూ నేటికీ 'శివ భావే జీవ సేవ' ఆదర్శాన్ని సజీవంగా ఉంచుతోందని ఆయన అన్నారు. ఈ సేవ, సమర్పణ, మానవత్వమే ఈ సంస్థకు అతిపెద్ద గుర్తింపు.

---------------

హిందూస్తాన్ సమచార్ / Santhosha Laxmi