వయనాడ్ 01 ఆగస్టు (హి.స.)

కేంద్ర భారతదేశంలో ఏర్పడిన తీవ్ర అల్పపీడన ప్రభావంతో కేరళ వ్యాప్తంగా నిన్న అర్ధరాత్రి నుండి భారీ నుండి అతి భారీ వర్షాలు కురుస్తున్నాయి. రాష్ట్రంలో మారుతున్న వాతావరణ పరిస్థితిని సమీక్షించిన భారత వాతావరణ శాఖ (IMD) ఈరోజు ఉదయం ఇడుక్కి, వయనాడ్, కాసరగోడ్, కోజికోడ్, మలప్పురం సహా మొత్తం 8 జిల్లాలకు రెడ్ అలర్ట్ ప్రకటించింది. ఈ జిల్లాల్లో 24 గంటల్లో 20 సెంటీమీటర్ల కంటే ఎక్కువ వర్షపాతం నమోదయ్యే అవకాశం ఉందని వాతావరణ కేంద్రం హెచ్చరించింది.భారీ వర్షాల నేపథ్యంలో కొండచరియలు విరిగిపడే ప్రమాదం ఉన్నందున కొండ ప్రాంతాల ప్రజలను సురక్షిత ప్రాంతాలకు తరలించేందుకు రాష్ట్ర ప్రభుత్వం చర్యలు చేపట్టింది. అత్యవసర సహాయక చర్యలు అందించడం కోసం కేంద్రం నుండి జాతీయ విపత్తు ప్రతిస్పందన బలగాల (NDRF) బృందాలను రంగంలోకి దించారు. స్థానిక పోలీసు, అగ్నిమాపక సిబ్బందితో పాటు కంట్రోల్ రూమ్‌లను 24 గంటలూ అందుబాటులో ఉంచినట్లు కేరళ ముఖ్యమంత్రి కార్యాలయం తెలిపింది. నదులు, తీర ప్రాంతాలకు ప్రజలు దూరంగా ఉండాలని, మత్స్యకారులు వేటకు వెళ్లరాదని కఠిన నిబంధనలు జారీ చేశారు

---------------

హిందూస్తాన్ సమచార్ / Santhosha Laxmi