కుల్గాం జిల్లా, 01 ఆగస్టు (హి.స.)

జమ్మూ కాశ్మీర్‌లోని దక్షిణ కుల్గాం జిల్లా కెలామ్ ప్రాంతంలో ఉన్న ఒక ఇటుకల బట్టీ వద్ద పనిచేస్తున్న వలస కార్మికులపై నిన్న రాత్రి ఉగ్రవాదులు విచక్షణారహితంగా కాల్పులు జరిపారు. ఈ పిరికిపంద దాడిలో ఛత్తీస్‌గఢ్ రాష్ట్రానికి చెందిన ఇద్దరు యువ వలస కార్మికులు మరణించారు. బాధితులలో ఒకరైన దీపక్ రాత్రే (24) కాల్పులు జరిగిన వెంటనే తీవ్ర గాయాలతో అక్కడికక్కడే ప్రాణాలు కోల్పోగా, తీవ్రంగా గాయపడిన భోపేందర్ (28) అనే మరో కార్మికుడిని మొదట అనంతనాగ్ ఆసుపత్రికి, ఆ తర్వాత మెరుగైన చికిత్స కోసం శ్రీనగర్‌లోని ఆసుపత్రికి తరలించారు. అక్కడ అత్యవసర విభాగంలో చికిత్స పొందుతూ ఆయన ఈరోజు తెల్లవారుజామున తుది శ్వాస విడిచారు.

ప్రస్తుతం అమర్‌నాథ్ యాత్ర కొనసాగుతున్న తరుణంలో ఈ టార్గెటెడ్ ఉగ్రదాడి జరగడంతో స్థానికంగా భద్రతను అత్యంత కట్టుదిట్టం చేశారు. ఈ దాడికి లష్కరే తోయిబా అనుబంధ సంస్థ అయిన 'ది రెసిస్టెన్స్ ఫ్రంట్' (TRF) బాధ్యత వహించినట్లు నివేదికలు చెబుతున్నాయి. ఘటన జరిగిన వెంటనే రంగంలోకి దిగిన భారత ఆర్మీ, జమ్మూ కాశ్మీర్ పోలీస్ బలగాలు కలిసి ఆ ప్రాంతాన్ని పూర్తిగా తమ ఆధీనంలోకి తీసుకున్నాయి. పరారైన ఉగ్రవాదులను పట్టుకోవడానికి ప్రస్తుతం అక్కడ పెద్ద ఎత్తున జాయింట్ సెర్చ్ ఆపరేషన్ కొనసాగుతోంది. జమ్మూ కాశ్మీర్ లెఫ్టినెంట్ గవర్నర్ మనోజ్ సిన్హా ఈ దాడిని తీవ్రంగా ఖండిస్తూ, బాధ్యులైన ఉగ్రవాదులను వదిలిపెట్టేది లేదని, వారిని ఏరిపారేయాలని భద్రతా బలగాలను ఆదేశించారు.

---------------

హిందూస్తాన్ సమచార్ / Santhosha Laxmi