హైదరాబాద్, 17 ఆగస్టు (హి.స.)

దేశంలోని రైల్వే స్టేషన్లలో ప్రయాణికులకు అందుబాటులో ఉన్న తాగునీటి నాణ్యత మరియు పారిశుద్ధ్య లోపాలపై కంప్ట్రోలర్ అండ్ ఆడిటర్ జనరల్ (CAG) పార్లమెంటులో సమర్పించిన ఆడిట్ నివేదిక దేశవ్యాప్తంగా ప్రయాణికులను తీవ్ర ఆందోళనకు గురిచేస్తోంది. దేశంలోని ప్రధాన రైల్వే స్టేషన్లలో, ముఖ్యంగా కోయంబత్తూరు, పాలక్కాడ్ జంక్షన్ వంటి పలు ప్రాంతాల్లో ప్రయాణికులు తాగే వాటర్ కూలర్ల నీటి నమూనాలలో ప్రమాదకరమైన 'ఈ-కోలై' (E. coli) బ్యాక్టీరియా ఉన్నట్లు సిఏజీ తన నివేదికలో స్పష్టంగా వెల్లడించింది. అంతేకాకుండా, సుమారు 59 రైల్వే స్టేషన్లలో కనీస బ్యాక్టీరియా పరీక్షలు కూడా నిర్వహించడం లేదని, 89 శాతం స్టేషన్లలో ప్రాథమిక ప్రయాణ సదుపాయాల కొరత తీవ్రంగా ఉందని సిఏజీ తప్పుపట్టింది. ఈ నివేదిక వెల్లడైన వెంటనే కేంద్ర ప్రభుత్వం తీవ్రంగా స్పందించింది. ప్రయాణికుల ఆరోగ్యం మరియు భద్రత విషయంలో ఎలాంటి నిర్లక్ష్యాన్ని సహించేది లేదని స్పష్టం చేస్తూ, తక్షణమే దిద్దుబాటు చర్యలు చేపట్టాలని రైల్వే మంత్రిత్వ శాఖను ఆదేశించింది. అన్ని స్టేషన్లలోని నీటి శుద్ధి ప్లాంట్లను అత్యవసరంగా తనిఖీ చేయాలని, క్లోరినేషన్ ప్రక్రియను క్రమం తప్పకుండా నిర్వహించాలని మరియు నిరంతరం నీటి నాణ్యత పరీక్షలు జరపాలని ఉన్నతాధికారులకు ఆదేశాలు జారీ అయ్యాయి. ప్రయాణికులకు సురక్షితమైన నీటిని అందించేందుకు రైల్వే బోర్డు ప్రత్యేక నిఘా బృందాలను రంగంలోకి దించింది.

---------------

హిందూస్తాన్ సమచార్ / Santhosha Laxmi