హైదరాబాద్, 17 ఆగస్టు (హి.స.)

స్వాతంత్య్ర దినోత్సవ వేడుకల సందర్భంగా కాంగ్రెస్ ప్రధాన కార్యాలయంలో జరిగిన ఒక పరిణామం దేశ రాజకీయాల్లో తీవ్ర దుమారం రేపుతోంది. ఆగస్టు 15న ఏఐసీసీ (AICC) ప్రధాన కార్యాలయంలో జాతీయ గీతం 'వందేమాతరం' పాడుతున్న సమయంలో కాంగ్రెస్ అగ్రనేతలు సోనియా గాంధీ, రాహుల్ గాంధీ, మరియు మల్లికార్జున ఖర్గే ప్రవర్తించిన తీరుపై బీజేపీ తీవ్ర అభ్యంతరం వ్యక్తంచేసిన సంగతి తెలిసిందే. వందేమాతరం గీతాన్ని పూర్తిగా ఆలపిస్తున్నప్పుడు సోనియా గాంధీ కొన్ని హావభావాలు (సైగలు) చేస్తూ అడ్డుకోవడానికి ప్రయత్నించారని బీజేపీ ఆరోపించింది. ఈ వివాదం ఈరోజు ఉదయం మరింత ముదిరి పోలీసు కేసు వరకు వెళ్ళింది. జాతీయ గీతాన్ని అవమానించారనే ఆరోపణలపై సోనియా గాంధీ, రాహుల్ గాంధీలపై దాఖలైన ఫిర్యాదును తాము స్వీకరించామని, దీనిపై ఢిల్లీ పోలీసులు ప్రస్తుతం ప్రాథమిక విచారణ జరుపుతున్నారని ఉన్నతాధికారులు వెల్లడించారు. మరోవైపు, బంకిం చంద్ర ఛటోపాధ్యాయ వంశస్థుడైన సుమిత్రో ఛటర్జీ కూడా సోనియా గాంధీకి లేఖ రాస్తూ ఈ ఘటనపై బేషరతుగా క్షమాపణ చెప్పాలని డిమాండ్ చేశారు. అయితే ఈ ఆరోపణలను కాంగ్రెస్ పార్టీ తీవ్రంగా ఖండిస్తోంది. కాంగ్రెస్ అధ్యక్షుడు ఖర్గే కోసం కుర్చీ అడగడానికే సోనియా గాంధీ సైగ చేశారని, దేశంలోని నిజమైన ఆర్థిక సమస్యల నుండి ప్రజల దృష్టిని మళ్లించడానికే బీజేపీ ఇలాంటి తప్పుడు ప్రచారాలు చేస్తోందని కాంగ్రెస్ ఎదురుదాడికి దిగింది.

---------------

హిందూస్తాన్ సమచార్ / Santhosha Laxmi