హైదరాబాద్, 29 ఆగస్టు (హి.స.) హైదరాబాద్లో టీజీఐఐసీ భూముల వేలం మరోసారి రికార్డు స్థాయిలో జరిగింది. రాయదుర్గం పాన్ మక్త ప్రాంతంలోని భూమికి భారీ ధర పలికింది. టీజీఐఐసీ నిర్వహించిన వేలంలో ఎకరం భూమి ఏకంగా రూ.269 కోట్లకు అమ్ముడుపోయింది. దీంతో హైదరాబాద్లో భూముల ధరలకు ఉన్న డిమాండ్ మరోసారి స్పష్టమైంది. రాయదుర్గం పాన్ మక్తలో టీజీఐఐసీ నిర్వహించిన భూముల వేలంలో ఓ రియల్ ఎస్టేట్ కంపెనీ 5.38 ఎకరాలను దక్కించుకుంది. ఈ వేలంలో ఎకరాకు రూ.269 కోట్ల ధర పలికినట్లు అధికారులు వెల్లడించారు. దీంతో మొత్తం 5.38 ఎకరాల భూమికి భారీ మొత్తంలో ఆదాయం సమకూరినట్లు తెలుస్తోంది.

ఇదే నెల 21వ తేదీన నిర్వహించిన టీజీఐఐసీ వేలంలో ఎకరం భూమికి రూ.264 కోట్ల వరకు ధర పలికింది. తాజాగా పాన్ మక్తలో జరిగిన వేలంలో ఎకరాకు మరో రూ.5 కోట్లు అదనంగా ధర పలకడంతో కొత్త రికార్డు నమోదైంది. హైదరాబాద్లో ముఖ్యంగా ఐటీ, వాణిజ్య కార్యకలాపాలకు కీలకమైన ప్రాంతాల్లో భూములకు భారీ డిమాండ్ కొనసాగుతోంది. రాయదుర్గం, పాన్ మక్త వంటి ప్రాంతాల్లో ఉన్న భూములపై రియల్ ఎస్టేట్ సంస్థలు ఆసక్తి చూపుతున్నాయి.

దీనికి అనుగుణంగానే ప్రభుత్వ భూముల వేలంలో భారీ ధరలు నమోదవుతున్నాయి. టీజీఐఐసీ భూముల వేలంలో ఎకరాకు రూ.269 కోట్ల రికార్డు ధర పలకడం హైదరాబాద్ రియల్ ఎస్టేట్ మార్కెట్లో చర్చనీయాంశంగా మారింది. కొద్ది రోజుల వ్యవధిలోనే ఎకరం భూమి ధరలో గణనీయమైన పెరుగుదల కనిపించడం ఈ ప్రాంతంలో భూములపై ఉన్న డిమాండ్ను సూచిస్తోంది.

---------------

హిందూస్తాన్ సమచార్ / రాశి భాగాయత్