లక్నో, 31 ఆగస్టు (హి.స.)

:

ఉత్తరప్రదేశ్ రాష్ట్రంలో స్వైన్ ఫ్లూ (H1N1) కేసులు ఒక్కసారిగా వెలుగుచూడటంతో యోగి ఆదిత్యనాథ్ ప్రభుత్వం అత్యంత అప్రమత్తమైంది. రాష్ట్రంలోని నాలుగు ప్రముఖ జిల్లాలలో స్వైన్ ఫ్లూ కేసులు నమోదైనట్లు అధికారిక వర్గాలు ధృవీకరించాయి. దీంతో రాష్ట్ర ఆరోగ్య శాఖ తీవ్ర ఆందోళన వ్యక్తం చేస్తూ, ప్రభావిత జిల్లాలతో పాటు పరిసర ప్రాంతాలలో కూడా తక్షణమే 'హై అలర్ట్' ప్రకటించింది.

పరిస్థితిని సమీక్షించిన ఉత్తరప్రదేశ్ ఉప ముఖ్యమంత్రి (ఆరోగ్య శాఖ బాధ్యతలు చూస్తున్న) బ్రజేష్ పాఠక్, ఉన్నతాధికారులతో అత్యవసర సమావేశాన్ని నిర్వహించారు. రాష్ట్రంలోని అన్ని ప్రభుత్వ, ప్రైవేటు ఆసుపత్రులలో ముందస్తు సంసిద్ధతను (Hospital Preparedness) తనిఖీ చేయాలని అధికారులను ఆదేశించారు. ముఖ్యంగా స్వైన్ ఫ్లూ రోగుల కోసం ప్రత్యేక ఐసోలేషన్ వార్డులను ఏర్పాటు చేయాలని, తగినన్ని మందులు, ఆక్సిజన్ సిలిండర్లు మరియు వెంటిలేటర్లను అందుబాటులో ఉంచాలని స్పష్టం చేశారు.

వైద్యులు మరియు పారామెడికల్ సిబ్బందికి ఈ వ్యాధి లక్షణాలు, చికిత్సా విధానాలపై ప్రత్యేక మార్గదర్శకాలను జారీ చేశారు. ప్రజలు కూడా జ్వరం, తీవ్రమైన దగ్గు, గొంతు నొప్పి మరియు శ్వాస తీసుకోవడంలో ఇబ్బంది వంటి లక్షణాలు ఉంటే నిర్లక్ష్యం చేయకుండా వెంటనే వైద్యులను సంప్రదించాలని ఆరోగ్య శాఖ సూచించింది. పబ్లిక్ ప్రదేశాలలో మాస్కులు ధరించడం, చేతులను శుభ్రంగా ఉంచుకోవడం వంటి ముందస్తు జాగ్రత్తలు తీసుకోవడం ద్వారా ఈ వైరస్ వ్యాప్తిని అరికట్టవచ్చని అవగాహన కార్యక్రమాలను ముమ్మరం చేశారు.

---------------

హిందూస్తాన్ సమచార్ / Santhosha Laxmi