హైదరాబాద్, 06 ఆగస్టు (హి.స.)

భారత్‌లో ఆశ్రయం పొందుతున్న బంగ్లాదేశ్ మాజీ ప్రధాని షేక్ హసీనా బుధవారం (ఆగస్టు 5, 2026) రాత్రి న్యూఢిల్లీ వేదికగా నిర్వహించిన వర్చువల్ విలేకరుల సమావేశం (Press Conference) అంతర్జాతీయంగా తీవ్ర రాజకీయ దుమారం రేపింది. ఆమె పదవి కోల్పోయిన రెండేళ్ల తర్వాత మొదటిసారిగా మీడియా ముందుకు వచ్చి మాట్లాడటంపై బంగ్లాదేశ్ తాత్కాలిక ప్రభుత్వం తీవ్ర అభ్యంతరం వ్యక్తంచేసింది. ఈ పరిణామం ఇరు దేశాల మధ్య ఉన్న దౌత్య మరియు ద్వైపాక్షిక సంబంధాలపై (Bilateral Relations) తీవ్ర ప్రతికూల ప్రభావం చూపుతుందని బంగ్లాదేశ్ విదేశాంగ మంత్రిత్వ శాఖ ఆందోళన వ్యక్తం చేస్తూ ఢిల్లీకి గట్టి నిరసన తెలిపింది.

న్యూఢిల్లీలోని ఫారెన్ కరెస్పాండెంట్స్ క్లబ్ ఆఫ్ సౌత్ ఆసియా' (FCC) వేదికగా ఈ ప్రెస్ మీట్ జరగ్గా... దీనితో తమ ప్రభుత్వానికి ఎలాంటి సంబంధం లేదని భారత విదేశాంగ శాఖ (MEA) స్పష్టమైన వివరణ ఇచ్చింది. ఇది పూర్తిగా ఒక ప్రైవేట్ మీడియా సంస్థ నిర్వహించిన కార్యక్రమమని, అక్కడ వ్యక్తమయ్యే రాజకీయ అభిప్రాయాలను భారత్ ఏమాత్రం సమర్థించదని విదేశాంగ శాఖ అధికార ప్రతినిధి రణధీర్ జైస్వాల్ పేర్కొన్నారు. అయినప్పటికీ, భారత్ కేంద్రంగా బంగ్లాదేశ్ ప్రస్తుత ప్రభుత్వానికి వ్యతిరేకంగా హసీనా వ్యాఖ్యలు చేయడంపై ఢాకా వర్గాలు ఆగ్రహం వ్యక్తం చేశాయి. బంగ్లాదేశ్ దేశీయ మీడియాలో ఈ ప్రసంగాల ప్రసారాలపై ఇప్పటికే అక్కడి ప్రభుత్వం నిషేధం విధించింది.

ఈ ఉద్రిక్తతల నేపథ్యంలో భారత హైకమిషనర్‌తో బంగ్లాదేశ్ అధికారులు అత్యవసరంగా చర్చలు జరిపారు. భారతదేశంలో ఉంటూ హసీనా ఇలాంటి రాజకీయ ప్రకటనలు చేయడం ఇరు దేశాల సత్సంబంధాలకు మంచిది కాదని, ఆమెను తక్షణమే తమ దేశానికి అప్పగించాలని (Extradition) బంగ్లాదేశ్ మరోసారి డిమాండ్ చేసింది. ఈ సున్నితమైన అంశంపై ఇరు దేశాల దౌత్యవేత్తలు నిరంతరం సంప్రదింపులు జరుపుతున్నారు.

---------------

హిందూస్తాన్ సమచార్ / Santhosha Laxmi