హైదరాబాద్, 06 ఆగస్టు (హి.స.)

భారత ఈశాన్య రాష్ట్రమైన అరుణాచల్ ప్రదేశ్‌లో గురువారం (ఆగస్టు 6, 2026) తెల్లవారుజామున వరుస భూకంపాలు సంభవించాయి. కేవలం రెండు గంటల వ్యవధిలోనే రెండుసార్లు భూమి కంపించడంతో సరిహద్దు ప్రాంత ప్రజలు తీవ్ర భయాందోళనలకు గురయ్యారు. నేషనల్ సెంటర్ ఫర్ సీస్మోలజీ (NCS) వెల్లడించిన వివరాల ప్రకారం.. అప్పర్ సియాంగ్ జిల్లాను కేంద్రంగా చేసుకుని ఈ ప్రకంపనలు చోటుచేసుకున్నాయి. మొదటి భూకంపం తెల్లవారుజామున 5:45 గంటలకు రాగా, ఆ తర్వాత కొద్దిసేపటికే ఉదయం 7:17 గంటల ప్రాంతంలో రెండోసారి భూమి కంపించింది.

ఈ రెండు భూకంపాల తీవ్రత రిక్టర్ స్కేలుపై స్వల్పంగానే నమోదైనట్లు శాస్త్రవేత్తలు తెలిపారు. తెల్లవారుజామున గాఢ నిద్రలో ఉన్న సమయంలో ఒక్కసారిగా ఇళ్లు, పాత్రలు కదలడంతో ప్రజలు భయంతో ఇళ్ల నుంచి బయటకు పరుగులు తీశారు. అయితే భూకంప కేంద్రం భూ అంతర్భాగంలో చాలా లోతులో ఉండటం వల్లే ఉపరితలంపై దీని ప్రభావం తక్కువగా ఉందని, కేవలం స్వల్ప అస్వస్థత (ప్రకంపనలు) మాత్రమే కలిగిందని అధికారులు స్పష్టం చేశారు.

ఈ వరుస భూకంపాల వల్ల రాష్ట్రంలో ఎలాంటి ప్రాణనష్టం కానీ, ఆస్తి నష్టం కానీ సంభవించలేదని స్థానిక జిల్లా యంత్రాంగం ప్రాథమిక నివేదికల్లో ధృవీకరించింది. అయినప్పటికీ, హిమాలయ పర్వత శ్రేణుల్లోని ఈ ప్రాంతం భూకంప తీవ్రత జోన్-5 పరిధిలోకి వస్తుండటంతో అధికారులు అప్రమత్తమయ్యారు. రాబోయే కొన్ని గంటల పాటు స్వల్పంగా ఆఫ్టర్ షాక్స్ (తదుపరి ప్రకంపనలు) వచ్చే అవకాశం ఉన్నందున సరిహద్దు మరియు పర్వత ప్రాంత ప్రజలు జాగ్రత్తగా ఉండాలని విపత్తు నిర్వహణ సంస్థ చెప్పింది

---------------

హిందూస్తాన్ సమచార్ / Santhosha Laxmi