హైదరాబాద్, 06 ఆగస్టు (హి.స.)

నైరుతి రుతుపవనాల ప్రభావంతో దేశంలోని పలు రాష్ట్రాల్లో వర్షాలు దంచికొడుతున్నాయి. ముఖ్యంగా కేరళ రాష్ట్రంలో వర్షాల ఉధృతి తీవ్రరూపం దాల్చింది. రాగల 24 గంటల్లో భారీ నుండి అతి భారీ వర్షాలు కురిసే అవకాశం ఉందన్న అంచనాలతో భారత వాతావరణ శాఖ (IMD) కేరళలోని కాసరగోడ్, కన్నూర్, వయనాడ్, కోజికోడ్ సహా మొత్తం 7 జిల్లాలకు ‘ఆరెంజ్ అలర్ట్’ జారీ చేసింది. తీరప్రాంతాల్లో గంటకు 40 నుండి 50 కిలోమీటర్ల వేగంతో బలమైన గాలులు వీచే అవకాశం ఉన్నందున, మత్స్యకారులు ఎవరూ సముద్రంలోకి వేటకు వెళ్లరాదని అధికారులు గట్టి హెచ్చరికలు జారీ చేశారు.మరోవైపు తెలంగాణ వ్యాప్తంగా కూడా రాబోయే రెండు రోజులు మోస్తరు నుండి భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం వెల్లడించింది. ముఖ్యంగా రాజధాని హైదరాబాద్‌తో పాటు దాని పరిసర జిల్లాల్లో ఆకాశం మేఘావృతమై ఉంటుందని, అకస్మాత్తుగా ఉరుములు, మెరుపులతో కూడిన వర్షాలు పడే ఛాన్స్ ఉందని పేర్కొంది. ఇప్పటికే కురుస్తున్న ముసురుతో లోతట్టు ప్రాంతాల ప్రజలు అప్రమత్తంగా ఉండాలని, నగరంలోని డ్రైనేజీలు, ప్రహరీ గోడల వెంబడి నడిచేటప్పుడు జాగ్రత్తలు వహించాలని జీహెచ్‌ఎంసీ (GHMC) అధికారులు సూచించారు.ఈ భారీ వర్షాల హెచ్చరికల నేపథ్యంలో కేరళ, తెలంగాణ రాష్ట్ర ప్రభుత్వాలు ముందస్తు రక్షణ చర్యలు చేపట్టాయి. విపత్తు నిర్వహణ బృందాలను (SDRF) రంగంలోకి దించి, నిరంతరం పరిస్థితిని సమీక్షిస్తున్నాయి. కొండచరియలు విరిగిపడే ప్రమాదం ఉన్న కేరళ ఏజెన్సీ ప్రాంతాల్లో పర్యాటకుల రాకపోకలపై ఆంక్షలు విధించారు. ప్రజలు అత్యవసరమైతే తప్ప బయటకు రాకూడదని, స్థానిక యంత్రాంగం ఇచ్చే సూచనలను ఖచ్చితంగా పాటించాలని అధికారులు స్పష్టం చేశారు.

---------------

హిందూస్తాన్ సమచార్ / Santhosha Laxmi