వరంగల్, 22 సెప్టెంబర్ (హి.స.) వరంగల్ ఎంజీఎం ఆస్పత్రిని పరిశీలించేందుకు వెళ్లిన మాజీ ప్రభుత్వ చీఫ్ విప్, మాజీ ఎమ్మెల్యే దాస్యం వినయ్ భాస్కర్ను పోలీసులు అడ్డుకోవడంతో ఉద్రిక్తత చోటుచేసుకుంది.

బీఆర్ఎస్ శ్రేణులు, పోలీసుల మధ్య తోపులాట జరిగింది. ఈ ఘటనలో వినయ్ భాస్కర్ కాలు, చేతికి గాయాలై రక్తస్రావం జరిగినట్లు ఆయన వర్గీయులు తెలిపారు.

ఆదివారం ఎంజీఎంలోని ఆరోగ్యశ్రీ వార్డులో పైకప్పు పెచ్చులు ఊడిపడటంతో రోగులు, అటెండర్లు గాయపడిన ఘటన మరువకముందే మంగళవారం ఆస్ఐసీయూ వార్డులో మరోసారి పైకప్పు పెచ్చులు ఊడిపడ్డాయి.

ఈ విషయం తెలుసుకున్న వినయ్ భాస్కర్ ఆస్పత్రి పరిస్థితులను పరిశీలించేందుకు ఎంజీఎంకు చేరుకున్నారు. దీంతో బీఆర్ఎస్ నాయకులు, కార్యకర్తలు పోలీసులతో వాగ్వాదానికి దిగారు. పోలీసులు అడ్డుకోవడంతో ఇరువర్గాల మధ్య తోపులాట చోటుచేసుకుంది.

ఈ క్రమంలో వినయ్ భాస్కర్కు గాయాలైనట్లు ఆయన వర్గీయులు తెలిపారు. బీఆర్ఎస్ శ్రేణులు 'సీఎం డౌన్ డౌన్' అంటూ నినాదాలు చేయడంతో అక్కడ కొద్దిసేపు ఉద్రిక్త పరిస్థితి నెలకొంది.అనంతరం పోలీసుల నిర్బంధాలను ఛేదించి వినయ్ భాస్కర్ ఎంజీఎం ప్రాంగణంలోకి వెళ్లి పరిస్థితులను పరిశీలించారు. ఈ సందర్భంగా ఆయన మాట్లాడుతూ ప్రజా సమస్యలను ప్రశ్నించే గొంతులను అణచివేయడమే కాంగ్రెస్ ప్రజాపాలనగా మారిందని విమర్శించారు.

---------------

హిందూస్తాన్ సమచార్ / విడియాల వెంకటేశ్వర్ రావు