హైదరాబాద్ , 23 సెప్టెంబర్ (హి.స.)ఉమ్మడి ఆదిలాబాద్ జిల్లాలోని నిర్మల్ పరిధిలో అవినీతికి పాల్పడిన ఒక గ్రామ పరిపాలనాధికారి (VRO) అవినీతి నిరోధక శాఖ (ACB) అధికారులకు రెడ్ హ్యాండెడ్గా చిక్కారు.

బాధితుడు అందించిన వివరాల ప్రకారం, తన భూమికి సంబంధించిన కొత్త పట్టాదార్ పాస్ పుస్తకం మంజూరు చేయడం కోసం ఆయన రెవెన్యూ కార్యాలయంలో దరఖాస్తు చేసుకున్నారు. అయితే, పని పూర్తి చేయడానికి VRO రూ. 80,000 లంచం చెల్లించాలని డిమాండ్ చేశారు. బాధితుడు అంత పెద్ద మొత్తంలో డబ్బు ఇవ్వలేనని కోరినా అధికారి నిరాకరించడంతో, వేరే మార్గం లేక బాధితుడు ఏసీబీ అధికారులను ఆశ్రయించి ఫిర్యాదు చేశారు.

ఫిర్యాదు స్వీకరించిన ఏసీబీ అధికారులు పక్కా వ్యూహంతో దాడికి పథకం రచించారు. బాధితుని నుంచి VRO నిర్దేశిత ప్రాంతంలో రూ. 80 వేల నగదును స్వీకరిస్తుండగా ఏసీబీ బృందం ఆకస్మికంగా దాడి చేసి ఆయనను అదుపులోకి తీసుకుంది. అధికారి చేతులను రసాయన పరీక్షల ద్వారా తనిఖీ చేయగా, లంచం తీసుకున్నట్లు ఆధారాలతో సహా నిరూపణ అయ్యింది.

ఘటనా స్థలంలో నగదును స్వాధీనం చేసుకున్న అధికారులు, సంబంధిత డాక్యుమెంట్లను పరిశీలించి కేసు నమోదు చేశారు. అనంతరం VROను అరెస్టు చేసి, హైదరాబాద్లోని ప్రత్యేక ఏసీబీ కోర్టుకు తరలించారు. ప్రభుత్వ అధికారులు ఎవరైనా పనుల కోసం లంచం డిమాండ్ చేస్తే వెంటనే తమను సంప్రదించాలని, అవినీతిపై కఠిన చర్యలు ఉంటాయని ఏసీబీ అధికారులు హెచ్చరించారు.

---------------

హిందూస్తాన్ సమచార్ / పుట్టా సుమన్