హైదరాబాద్ , 25 సెప్టెంబర్ (హి.స.)
హైదరాబాద్లో గణేష్ నిమజ్జనానికి సంబంధించిన ప్రధాన శోభాయాత్రలు శుక్రవారం ఉదయం నుంచే ఊపందుకున్నాయి. ముఖ్యంగా బాలాపూర్ నుంచి ప్రారంభమైన శోభాయాత్ర, ఖైరతాబాద్ గణేష్ నిమజ్జనం, నగరంలోని వివిధ ప్రాంతాల నుంచి హుస్సేన్సాగర్ వైపు తరలివస్తున్న విగ్రహాలతో నగరం పండుగ వాతావరణంలోకి వెళ్లింది. నిమజ్జన కార్యక్రమం ప్రశాంతంగా పూర్తయ్యేలా పోలీసులు భారీ స్థాయిలో భద్రతా ఏర్పాట్లు చేశారు. హైదరాబాద్లోనే దాదాపు 20 వేల మంది పోలీసులను విధుల్లో పెట్టినట్లు తాజా నివేదికలు చెబుతున్నాయి. అదనంగా సీసీ కెమెరాలు, డ్రోన్లు, కమాండ్ కంట్రోల్ వ్యవస్థలను ఉపయోగిస్తూ జనసమ్మర్థాన్ని పర్యవేక్షిస్తున్నారు.
ఖైరతాబాద్, ట్యాంక్బండ్, ఎన్టీఆర్ మార్గ్, నెక్లెస్ రోడ్, లిబర్టీ, ఎంజే మార్కెట్ తదితర ప్రాంతాల్లో సాధారణ వాహనాల రాకపోకలపై కఠిన ఆంక్షలు అమల్లో ఉన్నాయి. విగ్రహాలను తరలించే వాహనాలకు మాత్రమే కొన్ని మార్గాల్లో అనుమతులు ఉండగా, ఇతర వాహనాలను ప్రత్యామ్నాయ మార్గాలకు మళ్లిస్తున్నారు. ప్రధాన నిమజ్జన మార్గంలో సెప్టెంబర్ 25 ఉదయం నుంచి 26వ తేదీ ఉదయం వరకు ట్రాఫిక్ నియంత్రణలు కొనసాగనున్నాయి.
---------------
హిందూస్తాన్ సమచార్ / పుట్టా సుమన్
