విజయవాడ , 29 సెప్టెంబర్ (హి.స.)
విజయవాడ వేదికగా ‘మిషన్ కర్మయోగి’ దక్షిణ ప్రాంతీయ వర్క్షాప్ను ఆంధ్రప్రదేశ్ ముఖ్యమంత్రి నారా చంద్రబాబు నాయుడు ఘనంగా ప్రారంభించారు. ప్రభుత్వ పరిపాలనలో ఆధునిక పద్ధతులను ప్రవేశపెట్టడం, ఉద్యోగుల సామర్థ్యాన్ని మరింత మెరుగుపరచడమే లక్ష్యంగా ఈ కార్యక్రమాన్ని చేపట్టినట్లు ఆయన తెలిపారు.
ఈ సందర్భంగా మాట్లాడుతూ.. ప్రజలకు ప్రభుత్వ సేవలు అత్యంత వేగంగా, పారదర్శకంగా అందాలంటే క్షేత్రస్థాయి ఉద్యోగుల నైపుణ్యం ఎంతో కీలకమని సీఎం స్పష్టం చేశారు. డిజిటల్ పాలన వైపు అడుగులు వేస్తున్న తరుణంలో, సాంకేతిక పరిజ్ఞానాన్ని అందిపుచ్చుకోవడం, డేటా ఆధారిత నిర్ణయాలు తీసుకోవడం మరియు ప్రజలతో మమేకమై మెరుగైన సంబంధాలు కొనసాగించడంపై ఉద్యోగులకు ఈ వర్క్షాప్లో ప్రత్యేక శిక్షణ ఇస్తున్నట్లు వెల్లడించారు.
ప్రస్తుతం రాష్ట్రంలో భారీ ఎత్తున పెట్టుబడులను ఆకర్షించడం, మౌలిక వసతుల కల్పన మరియు గ్రామీణాభివృద్ధే ధ్యేయంగా ప్రభుత్వం పెద్దఎత్తున ప్రణాళికలు అమలు చేస్తోంది. ఈ కీలక తరుణంలో యంత్రాంగం యొక్క పరిపాలనా సామర్థ్యం మరింత పెరగాల్సిన అవసరం ఉందని అభిప్రాయపడ్డారు. ముఖ్యంగా, దక్షిణ భారత రాష్ట్రాల మధ్య ఉన్న పరిపాలనా అనుభవాలను పంచుకోవడం, అక్కడ విజయవంతమైన ఉత్తమ విధానాలను ఇక్కడ కూడా అమలు చేయడానికి ఇలాంటి వేదికలు ఎంతగానో ఉపయోగపడతాయని ఆయన ఆశాభావం వ్యక్తం చేశారు.
మరోవైపు, గ్రామీ ప్రాంతాల్లో మౌలిక వసతుల అభివృద్ధికి ప్రభుత్వం అత్యంత ప్రతిష్టాత్మకంగా రూ.11,085 కోట్ల భారీ వ్యయంతో ‘పల్లె పండుగ–3.0’ కార్యక్రమానికి శ్రీకారం చుట్టింది. ఇలాంటి బృహత్తర పథకాలను విజయవంతం చేయడంలో ప్రభుత్వ ఉద్యోగుల పాత్ర అమోఘమని, పరిపాలనా సామర్థ్యాన్ని పెంచుకుంటూ రాష్ట్ర అభివృద్ధిలో భాగస్వాములు కావాలని ఈ సందర్భంగా పిలుపునిచ్చారు.
---------------
హిందూస్తాన్ సమచార్ / పుట్టా సుమన్
