హైదరాబాద్, 28 సెప్టెంబర్ (హి.స.)

తెలంగాణలో పూల పండుగైన బతుకమ్మ ఉత్సవాలు ఎనిమిదవ రోజుకు చేరుకున్నాయి. తొమ్మిది రోజుల పాటు జరిగే ఈ పండుగలో, ఈ రోజును వెన్నముద్దల బతుకమ్మ అని పిలుస్తారు.ఈ రోజున మహిళలు వెన్నతో చేసిన పదార్థాలను నైవేద్యంగా సమర్పిస్తారు. అందుకే దీనిని 'వెన్నముద్దల బతుకమ్మ' అని పిలుస్తారు. ఈ రోజు గౌరమ్మకు సమర్పించే నైవేద్యంలో నువ్వులు, బెల్లం, వెన్న లేదా నెయ్యి కలిపి తయారు చేసిన పదార్థాలు ఉంటాయి. తొలిరోజు ఎంగిలిపూల బతుకమ్మ నుంచి ప్రతిరోజూ ఒక వరుసను పెంచుకుంటూ బతుకమ్మను పేరుస్తారు. ఎనిమిదవ రోజున, బతుకమ్మను ఎనిమిది వరుసలతో త్రికోణాకారంలో లేదా వలయాకారంలో అందంగా పేరుస్తారు. గులాబీ, చామంతి, తంగేడు, గునుగు, గడ్డి పూలతో దీన్ని అలంకరిస్తారు. పసుపుతో గౌరమ్మను తయారు చేసి బతుకమ్మ మధ్యలో ఉంచుతారు.ఇంటి ముందు పెద్ద ముగ్గులు వేసి, మధ్యలో బతుకమ్మను పెట్టి దాని చుట్టూ మహిళలు ఆడిపాడతారు. బతుకమ్మ పాటలు పాడుతూ, చప్పట్లు కొడుతూ సంబరాలు జరుపుకుంటారు. ఆ తర్వాత బతుకమ్మను చెరువులో లేదా నదిలో నిమజ్జనం చేస్తారు.ఇంటికి తిరిగి వచ్చిన తర్వాత, నైవేద్యంగా సమర్పించిన నువ్వులు, బెల్లం, వెన్నతో చేసిన పదార్థాలను పిల్లలకు పంచుతారు. మహిళలు వాయినాలు ఇచ్చిపుచ్చుకుంటారు. ఈ రోజుతో ఎనిమిదవ రోజు సంబరాలు ముగుస్తాయి. రేపటి చివరి రోజున,అత్యంత వైభవంగా జరుపుకునే సద్దుల బతుకమ్మ కోసం మహిళలు సిద్ధమవుతారు. సద్దుల బతుకమ్మతో తొమ్మిది రోజుల పూల పండుగ ముగుస్తుంది.

---------------

హిందూస్తాన్ సమచార్ / సంపత్ రావు, జర్నలిస్ట్..