హైదరాబాద్ , 22 అక్టోబర్ (హి.స.)ఎల్నినో పరిస్థితుల నేపథ్యంలో రానున్న కాలంలో ఎదురయ్యే వాతావరణ మార్పులు, నీటి కొరత వంటి సమస్యలను ముందుగానే అంచనా వేసి తగిన చర్యలు చేపట్టాలని మంత్రి అడ్లూరి లక్ష్మణ్ అధికారులకు సూచించారు. జగిత్యాల జిల్లా కలెక్టరేట్లో సంబంధిత అధికారులతో ఆయన సమీక్ష నిర్వహించి, జిల్లాలో ఎల్నినో ప్రభావాన్ని ఎదుర్కొనేందుకు అవసరమైన కార్యాచరణను సిద్ధం చేయాలని ఆదేశించారు.

వాతావరణ పరిస్థితుల్లో మార్పుల కారణంగా వర్షపాతం తగ్గే అవకాశం ఉంటే వ్యవసాయం, తాగునీటి సరఫరాపై దాని ప్రభావం పడకుండా ముందస్తు జాగ్రత్తలు తీసుకోవాలని మంత్రి స్పష్టం చేశారు. ముఖ్యంగా రానున్న ఎనిమిది నెలల పాటు జిల్లాకు అవసరమయ్యే నీటి పరిమాణాన్ని అంచనా వేసి, అందుబాటులో ఉన్న నీటి వనరులను సమర్థంగా వినియోగించుకునేలా ప్రణాళిక రూపొందించాలని సూచించారు. నీటి వృథాను అరికట్టడంతో పాటు అవసరమైన ప్రాంతాలకు తగిన విధంగా నీటిని అందించే చర్యలకు ప్రాధాన్యం ఇవ్వాలని తెలిపారు.

వ్యవసాయ రంగంపై ఎల్నినో ప్రభావం పడే అవకాశాలను దృష్టిలో ఉంచుకుని రైతులకు ముందుగానే అవగాహన కల్పించాలని మంత్రి పేర్కొన్నారు. నీటి వినియోగం అధికంగా ఉండే వరి పంటకు బదులుగా, స్థానిక వాతావరణానికి అనుకూలమైన ప్రత్యామ్నాయ పంటలను సాగు చేసే దిశగా రైతులను ప్రోత్సహించాలని సూచించారు. పంటల ఎంపికలో వ్యవసాయ నిపుణుల సలహాలు అందేలా చూడాలని తెలిపారు.

జిల్లాలో నీటి లభ్యత, వ్యవసాయ అవసరాలు, భవిష్యత్తు వాతావరణ పరిస్థితులను పరిగణనలోకి తీసుకుని శాఖల మధ్య సమన్వయంతో పనిచేయాలని మంత్రి అధికారులకు సూచించారు. సమస్యలు తీవ్రరూపం దాల్చిన తర్వాత స్పందించడం కంటే, ముందుగానే ప్రణాళికలు అమలు చేయడం ద్వారా నష్టాలను తగ్గించవచ్చని పేర్కొన్నారు. ఎల్నినో ప్రభావాన్ని ఎదుర్కొనేందుకు అధికారులు అప్రమత్తంగా ఉండాలని ఆయన ఆదేశించారు.

---------------

హిందూస్తాన్ సమచార్ / పుట్టా సుమన్