అమరావతి , 10 అక్టోబర్ (హి.స.)స్థానిక సంస్థల ఎన్నికలలో వెనుకబడిన తరగతులకు దక్కాల్సిన రిజర్వేషన్ల అంశంపై ఆంధ్రప్రదేశ్ ప్రభుత్వం అత్యంత ప్రతిష్టాత్మకంగా దృష్టి సారించింది. ఈ నేపథ్యంలో అమరావతి సచివాలయంలో ముఖ్యమంత్రి నారా చంద్రబాబు నాయుడు అధ్యక్షతన ప్రత్యేక మంత్రివర్గ సమావేశం అత్యవసరంగా జరిగింది. సుప్రీంకోర్టు వెలువరించిన తాజా తీర్పులు, స్థానిక సంస్థల ఎన్నికల నిర్వహణకు సంబంధించిన నిబంధనలపై సుదీర్ఘంగా చర్చించారు. బీసీల రాజకీయ ప్రాతినిధ్యం ఎట్టి పరిస్థితుల్లోనూ తగ్గకుండా చూడాలని ప్రభుత్వం భావిస్తోంది.

రాజకీయంగా బీసీలకు సముచిత స్థానం కల్పించే దిశగా రాజీవ్ రంజన్ మిశ్రా కమిషన్ సమర్పించిన నివేదికలోని పలు కీలక అంశాలపై మంత్రులు తమ అభిప్రాయాలను పంచుకున్నారు. న్యాయపరమైన చిక్కులు రాకుండా, అన్ని వర్గాల నుంచి వస్తున్న విజ్ఞప్తులను పరిగణలోకి తీసుకుంటూ ఒక సమగ్రమైన కార్యాచరణను రూపొందించాలని నిర్ణయించారు. త్వరలోనే దీనిపై తుది నిర్ణయం తీసుకుని ఎన్నికల కమిషన్కు నివేదించనున్నట్లు సమాచారం.

---------------

హిందూస్తాన్ సమచార్ / పుట్టా సుమన్