హైదరాబాద్ , 29 అక్టోబర్ (హి.స.)

తుపాను ప్రభావంతో రాష్ట్రంలోని పలు ప్రాంతాల్లో వాతావరణ పరిస్థితులు మారిపోయాయి. సాధారణంగా నమోదయ్యే ఉష్ణోగ్రతలతో పోలిస్తే పగటి ఉష్ణోగ్రతలు గణనీయంగా తగ్గినట్లు వాతావరణ శాఖ వెల్లడించింది. కొన్ని జిల్లాల్లో ఉష్ణోగ్రతలు 1.5 నుంచి 5.8 డిగ్రీల వరకు తగ్గినట్లు తెలిపింది. రాష్ట్రంలోని అన్ని జిల్లాల్లోనూ సాధారణ స్థాయి కంటే తక్కువ ఉష్ణోగ్రతలు నమోదవుతున్నాయని పేర్కొంది.

తుపాను ప్రభావం పూర్తిగా తొలగిపోకపోవడంతో రానున్న రెండు రోజుల పాటు రాష్ట్రంలో తేలికపాటి నుంచి మోస్తరు వర్షాలు కురిసే అవకాశం ఉందని అధికారులు అంచనా వేస్తున్నారు. పలు ప్రాంతాల్లో గంటకు 30 నుంచి 40 కిలోమీటర్ల వేగంతో ఈదురుగాలులు వీచే అవకాశముందని హెచ్చరించారు. వర్షాలు, గాలుల కారణంగా రోజువారీ కార్యకలాపాలపై ప్రభావం పడే అవకాశం ఉంది.

వాతావరణంలో చోటుచేసుకుంటున్న మార్పుల నేపథ్యంలో ప్రజలు అప్రమత్తంగా ఉండాలని సూచిస్తున్నారు. ముఖ్యంగా ఈదురుగాలులు వీచే సమయంలో చెట్ల కింద, పాత భవనాల సమీపంలో ఉండకుండా జాగ్రత్తలు తీసుకోవాలని చెబుతున్నారు. రైతులు కూడా వర్ష సూచనను దృష్టిలో ఉంచుకుని పంటల విషయంలో తగిన ముందస్తు చర్యలు చేపట్టాలని సూచిస్తున్నారు. రానున్న రెండు రోజులు వాతావరణ పరిస్థితులను గమనిస్తూ, వాతావరణ శాఖ విడుదల చేసే తాజా హెచ్చరికలను అనుసరించడం మంచిదని అధికారులు పేర్కొన్నారు.

---------------

హిందూస్తాన్ సమచార్ / పుట్టా సుమన్