హైదరాబాద్, 29 అక్టోబర్ (హి.స.)

రాష్ట్రంలో ఎల్‌నినో ప్రభావం వల్ల తలెత్తిన కరువు పరిస్థితులను ఎదుర్కోవడంలో ప్రభుత్వానికి, బాధితులకు అండగా నిలిచేందుకు తెలంగాణ రెవెన్యూ ఉద్యోగుల సంఘం (ట్రెసా - TRESA) కీలక నిర్ణయం తీసుకుంది. ప్రతికూల పరిస్థితుల్లో ప్రజలకు తోడ్పాటునందించాలనే ఉద్దేశంతో ముఖ్యమంత్రి సహాయ నిధికి (CMRF) రూ. 5 లక్షల విరాళాన్ని ప్రకటించింది.

రాష్ట్ర రెవెన్యూ, గృహనిర్మాణ, సమాచార శాఖల మంత్రి పొంగులేటి శ్రీనివాసరెడ్డిని ఆయన నివాసంలో కలిసి ట్రెసా ప్రతినిధులు విరాళానికి సంబంధించిన చెక్కును అందజేశారు. ట్రెసా రాష్ట్ర అధ్యక్షుడు కె. గౌతమ్ కుమార్, ప్రధాన కార్యదర్శి ఎల్. రమణ్‌రెడ్డి నేతృత్వంలో ప్రతినిధి బృందం మంత్రికి శుభాకాంక్షలు తెలియజేసి, అనంతరం ఈ ఆర్థిక సాయాన్ని సమర్పించింది.

ఈ సందర్భంగా ట్రెసా అధ్యక్షుడు గౌతమ్ కుమార్ మాట్లాడుతూ.. ప్రకృతి విపత్తులు, క్లిష్టమైన పరిస్థితులు ఎదురైనప్పుడు బాధితులకు చేయూతనందించడం ప్రతి ఉద్యోగి సామాజిక బాధ్యత అని స్పష్టం చేశారు. ప్రభుత్వానికి, ప్రజలకు నడుమ నిరంతరం వారధిగా పనిచేసే రెవెన్యూ వ్యవస్థ.. సామాజిక సేవా కార్యక్రమాల్లోనూ ఎల్లప్పుడూ ముందుంటుందని పేర్కొన్నారు. విపత్తుల సమయంలో ప్రభుత్వం చేపడుతున్న సహాయక చర్యలకు తమవంతు మద్దతుగా ఈ ఆర్థిక సాయాన్ని అందించినట్లు వెల్లడించారు.

ఉద్యోగులు చూపుతున్న సామాజిక స్పృహను, వారి ఉదారతను మంత్రి పొంగులేటి శ్రీనివాసరెడ్డి అభినందించారు. ప్రభుత్వ సంక్షేమ కార్యక్రమాలు క్షేత్రస్థాయిలోకి తీసుకెళ్లడంలో రెవెన్యూ ఉద్యోగుల పాత్ర కీలకమని, ఇలాంటి విపత్కర వేళల్లో స్పందించి ముందుకొచ్చినందుకు ట్రెసా నాయకులకు, ఉద్యోగులకు కృతజ్ఞతలు తెలిపారు. ఈ కార్యక్రమంలో ట్రెసా కేంద్ర కమిటీ నాయకులు, వివిధ జిల్లాల ప్రతినిధులు పాల్గొన్నారు.

---------------

హిందూస్తాన్ సమచార్ / Santhosha Laxmi