అమరావతి:, 29 అక్టోబర్ (హి.స.)

ఆంధ్రప్రదేశ్‌లోని నగరపాలక సంస్థలు (కార్పోరేషన్లు), పురపాలక సంఘాలు (మున్సిపాలిటీలు) మరియు నగర పంచాయతీ ఎన్నికల పోలింగ్ రోజున ఓటర్లు తమ ఓటు హక్కును వినియోగించుకునేలా రాష్ట్ర ప్రభుత్వం కీలక ఉత్తర్వులు జారీ చేసింది. ఎన్నికల సంఘం సవరించిన షెడ్యూల్ ప్రకారం నవంబర్ 1న పోలింగ్ జరగనున్న నేపథ్యంలో, ఆ రోజున ఓటు హక్కు ఉన్న ఉద్యోగులకు వేతనంతోకూడిన సెలవును ప్రకటించారు.

రాష్ట్రంలోని అన్ని ప్రభుత్వ, ప్రైవేటు సంస్థలు, పరిశ్రమలు, వాణిజ్య సముదాయాలు, ఐటీ కంపెనీలు మరియు దిగువ స్థాయి దుకాణాలలో పనిచేసే ఉద్యోగులు, దినసరి కూలీలకు ఈ ఉత్తర్వులు వర్తిస్తాయి.

షాప్స్ అండ్ ఎస్టాబ్లిష్‌మెంట్స్ చట్టం అలాగే ప్రజా ప్రాతినిధ్య చట్టం ప్రకారం ఓటు హక్కు కలిగిన ఉద్యోగులందరికీ పోలింగ్ రోజున వేతనంలో ఎలాంటి కోత విధించకుండా విధిగా సెలవు ఇవ్వాలని కార్మిక శాఖ అధికారులు ఉత్తర్వుల్లో స్పష్టం చేశారు. ఒకవేళ ఏవైనా సంస్థలు నిబంధనలు ఉల్లంఘించి ఉద్యోగులకు పోలింగ్ రోజు సెలవు నిరాకరిస్తే, సదరు యాజమాన్యాలపై చట్టపరమైన కఠిన చర్యలు తీసుకుంటామని ప్రభుత్వం హెచ్చరించింది.

నవంబర్ 1న ఉదయం నుంచి పోలింగ్ జరగనుండగా, అవసరమైన ప్రాంతాల్లో నవంబర్ 2న రీపోలింగ్ నిర్వహించి, నవంబర్ 3న ఓట్ల లెక్కింపు చేపట్టనున్నారు.

---------------

హిందూస్తాన్ సమచార్ / Santhosha Laxmi