అమరావతి:, 29 అక్టోబర్ (హి.స.)

ఆంధ్రప్రదేశ్‌లో సంభవించిన 'ఆర్నబ్' తుఫాను తీవ్ర నష్టాన్ని మిగిల్చింది. ఈ తుఫాను ధాటికి రాష్ట్రవ్యాప్తంగా దాదాపు 3,08,791 హెక్టార్లలో వ్యవసాయ, ఉద్యానవన పంటలు నీటమునిగి తీవ్రంగా దెబ్బతిన్నట్లు ప్రాథమిక అంచనాలు వెల్లడిస్తున్నాయి. ఈ విపత్తు వల్ల రాష్ట్రవ్యాప్తంగా లక్షలాది మంది రైతులు తీవ్రంగా నష్టపోయారు.

భారీ ఈదురుగాలులు, ఎడతెరిపి లేని వర్షాల కారణంగా కోస్తా జిల్లాల్లోని వరి పంట పూర్తిగా నేలమట్టమై నీట మునిగింది. వరితో పాటు అరటి, కొబ్బరి, బొప్పాయి, కూరగాయలు మరియు పూల తోటలకు తీవ్ర నష్టం వాటిల్లింది. ముఖ్యంగా డాక్టర్ బీఆర్ అంబేడ్కర్ కోనసీమ, పశ్చిమ గోదావరి, కాకినాడ, విజియానగరం, శ్రీకాకుళం జిల్లాల్లో పంట నష్టం తీవ్రత ఎక్కువగా ఉన్నట్లు అధికారులు గుర్తించారు.

చేతికొచ్చిన పంట కళ్లముందే నీటిపాలు కావడంతో రైతాంగం కన్నీరుమున్నీరవుతోంది. క్షేత్రస్థాయిలో నీరు ఇంకిన తర్వాత పూర్తిస్థాయిలో నష్టాన్ని అంచనా వేస్తామని, బాధితులకు తక్షణ పెట్టుబడి రాయితీ (ఇన్‌పుట్ సబ్సిడీ) అందించి ఆదుకోవాలని రాష్ట్ర ప్రభుత్వం కేంద్రాన్ని కోరింది. నష్టపరిహారాన్ని వేగంగా అందించడానికి అధికారులు ఎనుమరేషన్ ప్రక్రియను ముమ్మరం చేశారు.

---------------

హిందూస్తాన్ సమచార్ / Santhosha Laxmi