హైదరాబాద్ , 12 నవంబర్ (హి.స.)

తెలంగాణ ముఖ్యమంత్రి రేవంత్రెడ్డి నాంపల్లిలోని ప్రజాప్రతినిధుల ప్రత్యేక కోర్టుకు హాజరయ్యారు. కరోనా నిబంధనల ఉల్లంఘనకు సంబంధించి నమోదైన కేసు విచారణలో భాగంగా ఆయన కోర్టుకు వచ్చినట్లు తెలుస్తోంది. ఈ పరిణామం రాజకీయ వర్గాల్లో ఆసక్తికరంగా మారింది.

ఈ కేసు 2021లో జరిగిన నాగార్జునసాగర్ ఉప ఎన్నికల సమయంలో నమోదైంది. అప్పట్లో ఎన్నికల ప్రచారంలో పాల్గొన్న సందర్భంగా కరోనా నియంత్రణ నిబంధనలను ఉల్లంఘించారనే ఆరోపణలు రేవంత్రెడ్డిపై వచ్చాయి. ఎన్నికల ప్రచార కార్యక్రమాల్లో కొవిడ్ మార్గదర్శకాలను పాటించలేదని పేర్కొంటూ సంబంధిత అధికారులు కేసు నమోదు చేశారు.

ఆ సమయంలో కరోనా వ్యాప్తి నేపథ్యంలో ప్రభుత్వం పలు ఆంక్షలు విధించింది. బహిరంగ సభలు, ర్యాలీలు, రాజకీయ సమావేశాల నిర్వహణపై కూడా పరిమితులు అమల్లో ఉన్నాయి. ఈ క్రమంలో నిబంధనల ఉల్లంఘన జరిగిందన్న ఫిర్యాదుతో కేసు నమోదైంది.

ప్రస్తుతం ఈ కేసుకు సంబంధించి నాంపల్లి ప్రజాప్రతినిధుల కోర్టులో విచారణ కొనసాగుతోంది. అందులో భాగంగానే ముఖ్యమంత్రి రేవంత్రెడ్డి న్యాయస్థానానికి హాజరయ్యారు. కేసు తదుపరి విచారణలో కోర్టు ఎలాంటి నిర్ణయం తీసుకుంటుందన్నది ఆసక్తిగా మారింది.

---------------

హిందూస్తాన్ సమచార్ / పుట్టా సుమన్