
యాదగిరిగుట్ట, 22 నవంబర్ (హి.స.) ప్రముఖ పుణ్యక్షేత్రమైన యాదగిరిగుట్ట శ్రీలక్ష్మీ నరసింహ స్వామి ఆలయంలో భక్తుల రద్దీ కొనసాగుతోంది. స్వామివారిని దర్శించుకునేందుకు వివిధ ప్రాంతాల నుంచి పెద్ద సంఖ్యలో భక్తులు తరలివస్తుండటంతో ఆలయ పరిసరాలు సందడిగా మారాయి. భక్తుల రాక పెరగడంతో దర్శనానికి కొంత సమయం వేచి ఉండాల్సిన పరిస్థితి ఏర్పడింది.
ప్రస్తుతం స్వామివారి ఉచిత దర్శనం కోసం వచ్చే భక్తులకు సుమారు మూడు గంటల సమయం పడుతోంది. ప్రత్యేక దర్శనం చేసుకునే వారికి దాదాపు గంటన్నర సమయం పడుతున్నట్లు ఆలయ వర్గాలు వెల్లడించాయి. భక్తుల రద్దీకి అనుగుణంగా దర్శన క్యూలైన్లలో ఏర్పాట్లు కొనసాగుతున్నాయి.
స్వామివారిని దర్శించుకున్న భక్తులు ప్రత్యేక పూజలు నిర్వహించి మొక్కులు చెల్లించుకుంటున్నారు. వారాంతాలు, సెలవు రోజుల్లో యాదాద్రికి భక్తుల రాక మరింత పెరిగే అవకాశం ఉండటంతో ఆలయ అధికారులు తగిన ఏర్పాట్లపై దృష్టి సారిస్తున్నారు. భక్తులకు ఎలాంటి అసౌకర్యం కలగకుండా దర్శన ప్రక్రియను సజావుగా నిర్వహిస్తున్నారు.
యాదాద్రి క్షేత్రానికి వస్తున్న భక్తులు దర్శన సమయాన్ని దృష్టిలో ఉంచుకుని తమ ప్రయాణాన్ని ప్లాన్ చేసుకోవాలని సూచిస్తున్నారు.
---------------
హిందూస్తాన్ సమచార్ / పుట్టా సుమన్