వాషింగ్టన్ డిసి, 16 ఏప్రిల్ (హి.స.)
అంతర్జాతీయ రాజకీయాల్లో మరో కీలక మలుపు చోటుచేసుకుంది. ఇరాన్తో నెలకొన్న ఉద్రిక్తతల నేపథ్యంలోనే, ఇప్పుడు అమెరికా తన దృష్టిని క్యూబా వైపు మళ్లించినట్లు సంకేతాలు వెలువడుతున్నాయి. అధ్యక్షుడు డొనాల్డ్ ట్రంప్ ఆదేశిస్తే క్యూబాపై సైనిక చర్యలు వెంటనే అమలు చేసేందుకు అవసరమైన 'కంటింజెంట్ ప్లానింగ్'ను వేగవంతం చేయాలని పెంటగాన్కు ఆదేశాలు అందినట్లు అంతర్జాతీయ మీడియా వర్గాలు వెల్లడించాయి. ప్రెసిడెంట్ డొనాల్డ్ ట్రంప్ ఇటీవల వివిధ వేదికలపై చేసిన వ్యాఖ్యలు ఈ పరిణామాలకు ప్రధాన కారణంగా నిలుస్తున్నాయి. “క్యూబా ఒక విఫల దేశం. ఇరాన్ వివాదం ముగిసిన తర్వాత మేము క్యూబా వైపు వెళ్లవచ్చు” అని ట్రంప్ చేసిన ప్రకటనలు అంతర్జాతీయంగా తీవ్ర చర్చకు దారితీశాయి.
గత కొన్ని వారాలుగా ఆయన, “క్యూబాను చేజిక్కించుకోవడం నాకు దక్కే గౌరవం”, “నేను కోరుకుంటే క్యూబా విషయంలో ఏదైనా చేయగలను” అంటూ బహిరంగంగానే హెచ్చరికలు జారీ చేశారు. ఈ వ్యాఖ్యలు కేవలం మాటలకే పరిమితం కాకుండా, పెంటగాన్ స్థాయిలో సైనిక ప్రణాళికలు సిద్ధమవుతుండటంతో, క్యూబా ఒక కొత్త భౌగోళిక-రాజకీయ పోరాట వేదికగా మారే అవకాశం ఉందని విశ్లేషకులు ఆందోళన వ్యక్తం చేస్తున్నారు.
క్యూబా ప్రస్తుతం ఎదుర్కొంటున్న తీవ్రమైన ఇంధన సంక్షోభం మరియు పవర్ కట్స్ (బ్లాక్ అవుట్స్)ను అమెరికా ఒక అవకాశంగా భావిస్తోంది. గత ఫిబ్రవరి నుండి క్యూబాకు వెళ్లే చమురు నౌకలను అమెరికా అడ్డుకోవడంతో పాటు, చమురు సరఫరా చేసే ఇతర దేశాలపై భారీ టారిఫ్లు విధిస్తామని బెదిరించడం వంటి చర్యలు, ఆ దేశంలో 'రెజీమ్ చేంజ్' తీసుకురావాలనే వాషింగ్టన్ వ్యూహంలో భాగమని స్పష్టమవుతోంది.
---------------
హిందూస్తాన్ సమచార్ / SANDHYA PRASADA PV
