న్యూఢిల్లీ: 16 జూలై (హి.స.)
దేశవ్యాప్తంగా సంచలనం సృష్టించిన నీట్-యుజి (NEET-UG) ప్రశ్నాపత్రం లీకేజీ కేసులోసెంట్రల్ బ్యూరో ఆఫ్ ఇన్వెస్టిగేషన్ (CBI)
ప్రత్యేక న్యాయస్థానం ముందు సంచలన విషయాలను వెల్లడించింది.
మహారాష్ట్రలోని లాతూర్కు చెందిన కోచింగ్ సెంటర్ యజమాని శివరాజ్ రఘునాథ్ మోటేగావ్కర్,
నేషనల్ టెస్టింగ్ ఏజెన్సీ (NTA) ప్రశ్నాపత్రాల
రూపకల్పన ప్యానెల్ సభ్యుడైన పి.వి. కులకర్ణికి రూ. 5
లక్షలు లంచం ఇచ్చి పరీక్షకు ముందే రసాయన శాస్త్రం (కెమిస్ట్రీ) ప్రశ్నలను
సంపాదించినట్లు దర్యాప్తు సంస్థ పేర్కొంది.
ఈ కేసులో నిందితుడైన మోటేగావ్కర్ దాఖలు
చేసిన బెయిల్ పిటిషన్ను వ్యతిరేకిస్తూ సీబీఐ రౌస్ ఎవెన్యూ ప్రత్యేక కోర్టుకు
పూర్తి వివరాలను సమర్పించింది. కులకర్ణి నిర్వహించే కెమిస్ట్రీ ట్యూషన్ క్లాసులకు
మోటేగావ్కర్ కుమారుడు హాజరయ్యేవాడని, ఆ సమయంలోనే ఈ
ప్రశ్నలను చేరవేశారని అధికారులు తెలిపారు. నిందితుడి మొబైల్ ఫోన్ను స్వాధీనం
చేసుకున్న సీబీఐ, అందులో చేతిరాతతో ఉన్న 132 కెమిస్ట్రీ ప్రశ్నలకు సంబంధించిన 36
చిత్రాలను గుర్తించింది. ఇందులో ఆశ్చర్యకరంగా 111
ప్రశ్నలు, ఎన్టీఏ సిద్ధం చేసిన అసలు నీట్ మాస్టర్
ప్రశ్నాపత్రంలోని ప్రశ్నలతో పూర్తిగా సరిపోలినట్లు [CBI] కోర్టుకు
వివరించింది. లీకేజీకి ప్రతిఫలంగా ఇచ్చిన రూ. 5
లక్షల నగదును కూడా సహ నిందితుల నుండి స్వాధీనం చేసుకున్నామని, ఈ కుట్రలో లోతైన విచారణ నిమిత్తం నిందితుడికి బెయిల్ ఇవ్వద్దని సీబీఐ
కోరింది.
---------------
హిందూస్తాన్ సమచార్ / Santhosha Laxmi
