న్యూఢిల్లీ, 17 జూలై (హి.స.)

దేశంలో లోక్‌సభ, రాష్ట్రాల అసెంబ్లీలకు ఒకేసారి ఎన్నికలు నిర్వహించేలా ప్రతిపాదించిన 'వన్ నేషన్, వన్ ఎలక్షన్' (ONOE) బిల్లుపై కాంగ్రెస్ సీనియర్ నాయకుడు, ఎంపీ కేసీ వేణుగోపాల్ కీలక వ్యాఖ్యలు చేశారు. విపక్షాల మద్దతు లేకుండా కేంద్ర ప్రభుత్వం ఈ బిల్లును పార్లమెంటులో ముందుకు తీసుకువెళ్లడం సాధ్యం కాదని ఆయన స్పష్టం చేశారు. ఢిల్లీలో విలేకరులతో మాట్లాడిన ఆయన, ఈ చట్టాన్ని సభలోకి తీసుకురావడానికి ముందే కేంద్రం ప్రతిపక్ష పార్టీలతో కూలంకషంగా చర్చలు జరపాలని డిమాండ్ చేశారు. అసలు ప్రభుత్వం బిల్లులో ఎలాంటి నిబంధనలు తీసుకురాబోతుందో మొదట తమకు స్పష్టత ఇవ్వాలని, ఆ ప్రతిపాదనలను చూసిన తర్వాతే తాము తమ తుది నిర్ణయాన్ని వెల్లడిస్తామని పేర్కొన్నారు.'ఒక దేశం - ఒకే ఎన్నిక' ప్రక్రియను తీసుకురావడానికి ఉద్దేశించిన రాజ్యాంగ (129వ సవరణ) బిల్లు-2024, అలాగే కేంద్రపాలిత ప్రాంతాల చట్టాల (సవరణ) బిల్లు-2024 లపై నియమించిన సంయుక్త పార్లమెంటరీ కమిటీ (JPC) తన నివేదికను ఖరారు చేసి పార్లమెంటుకు సమర్పించనున్న తరుణంలో కేసీ వేణుగోపాల్ చేసిన ఈ వ్యాఖ్యలు ప్రాధాన్యత సంతరించుకున్నాయి. ఇలాంటి కీలకమైన రాజ్యాంగ సవరణ బిల్లులకు పార్లమెంటులో నెగ్గాలంటే కచ్చితంగా ప్రత్యేక మెజారిటీ (మూడింట రెండు వంతుల సభ్యుల మద్దతు) అవసరమవుతుందని, అందువల్ల విపక్షాలను విస్మరించి కేంద్రం ఏకపక్షంగా ముందడుగు వేయలేదని ఆయన గుర్తుచేశారు. మరోవైపు, త్వరలో ప్రారంభం కానున్న పార్లమెంట్ వర్షాకాల సమావేశాలలో ఈ బిల్లుతో పాటు నీట్ పరీక్షా పేపర్ల లీకేజీ, అయోధ్య రామాలయ విరాళాల అక్రమాలు వంటి పలు ప్రజాసమస్యలపై ప్రభుత్వాన్ని నిలదీసేందుకు కాంగ్రెస్ నేతృత్వంలోని 'ఇండియా' (INDIA) కూటమి సిద్ధమవుతోంది. ఈ నేపథ్యంలోనే జూలై 20న పార్లమెంట్ ఉభయ సభల ప్రతిపక్ష నేతలు సమావేశమై, ప్రభుత్వ వ్యూహాలను తిప్పికొట్టేందుకు ఉమ్మడి ప్రణాళికను రూపొందించుకోనున్నారు.

హిందూస్తాన్ సమచార్ / Santhosha Laxmi