న్యూఢిల్లీ, 17 జూలై (హి.స.)

దేశంలో సంచలనం సృష్టించిన నీట్ (NEET-UG) మరియు ఇతర పోటీ పరీక్షల అవకతవకలకు నిరసనగా లడఖ్‌కు చెందిన ప్రముఖ విద్యా సంస్కర్త, పర్యావరణ కార్యకర్త సోనమ్ వాంగ్‌చుక్ చేపట్టిన ఆమరణ నిరాహార దీక్ష శుక్రవారం నాటికి 20వ రోజుకు చేరుకుంది. ఢిల్లీలోని జంతర్ మంతర్ వద్ద జరుగుతున్న ఈ దీక్షలో ఆయన ఆరోగ్యం అత్యంత క్షీణించి, క్లిష్ట దశకు చేరుకుందని వైద్యులు హెచ్చరిస్తున్నప్పటికీ, ఆయన తన పట్టు వీడటం లేదు. ఈ సందర్భంగా జూలై 17న నిరసనకారులను ఉద్దేశించి మాట్లాడిన వాంగ్‌చుక్.. భావోద్వేగంతో కూడిన కొన్ని వ్యంగ్య వ్యాఖ్యలు చేశారు.తాను శారీరకంగా బలహీనపడ్డానని, అయితే అంతర్గతంగా తన సంకల్పం చాలా బలంగా ఉందని వాంగ్‌చుక్ పేర్కొన్నారు. పార్లమెంట్ వర్షాకాల సమావేశాలు ప్రారంభమయ్యే జూలై 20వ తేదీన తాము చేపట్టబోయే శాంతియుత 'పార్లమెంట్ మార్చ్' (చలో సంసద్) కోసం ఈ శక్తినంతా కూడగట్టుకోవాలని పిలుపునిచ్చారు. నేను ఎట్టిపరిస్థితుల్లోనూ జూలై 20 వరకు ప్రాణాలతో ఉంటాను. ఒకవేళ మీరంతా రాక, జూలై 20న మనం చేపట్టే మార్చ్ విఫలమైతే.. నేను ఖచ్చితంగా దయ్యంగా (Ghost) తిరిగి వస్తాను అంటూ ఆయన నవ్వుతూ వ్యాఖ్యానించారు.ఈ నిరసన కార్యక్రమాన్ని విద్యార్థి సంఘాలు, యువత నేతృత్వంలోని 'కాక్‌రోచ్ జనతా పార్టీ' (CJP) గత 28 రోజులుగా నిర్వహిస్తోంది. జూన్ 28న సోనమ్ వాంగ్‌చుక్ ఈ ఉద్యమంలో చేరి ఆమరణ దీక్షకు దిగారు. పరీక్షల లీకేజీల బాధ్యత వహిస్తూ కేంద్ర విద్యాశాఖ మంత్రి ధర్మేంద్ర ప్రధాన్ తక్షణమే రాజీనామా చేయాలని, అలాగే పరీక్షల అక్రమాల కారణంగా మనస్తాపానికి గురై ఆత్మహత్య చేసుకున్న విద్యార్థుల కుటుంబాలకు ₹1 కోటి చొప్పున నష్టపరిహారం అందించాలని నిరసనకారులు డిమాండ్ చేస్తున్నారు.గత 19 రోజులుగా కేవలం ఉప్పు నీటిపైనే జీవిస్తున్న 59 ఏళ్ల వాంగ్‌చుక్.. ఇప్పటికే 9 కిలోల కంటే ఎక్కువ బరువు తగ్గారు. ఆయన కండరాల క్షీణతతో తీవ్రమైన నొప్పితో బాధపడుతున్నారని, కనీసం నిలబడలేని స్థితిలో ఉన్నారని వైద్య బృందం వెల్లడించింది. ఈ నేపథ్యంలో వాంగ్‌చుక్ ఆరోగ్య పరిస్థితిని నిరంతరం పర్యవేక్షించాలని మరియు అవసరమైన వైద్య సహాయం అందించాలని ఢిల్లీ హైకోర్టు కూడా కేంద్ర ప్రభుత్వానికి ఆదేశాలు జారీ చేసింది. సమాజంలోని వివిధ వర్గాల ప్రజలు, రాజకీయ నాయకులు ఆయనను కలిసి దీక్ష విరమించాలని కోరుతున్నప్పటికీ, ప్రభుత్వం నుండి స్పష్టమైన హామీ వచ్చే వరకు లేదా జూలై 20 పార్లమెంట్ మార్చ్ ముగిసే వరకు పోరాటం ఆపేది లేదని ఆయన స్పష్టం చేశారు.

-------------

హిందూస్తాన్ సమచార్ / Santhosha Laxmi