లక్నో, 17 జూలై (హి.స.) ఉత్తరప్రదేశ్ రాజధాని లక్నోలోని ఇందిరా గాంధీ ప్రతిష్ఠాన్‌లో 'మై భారత్' జాతీయ యువ వాలంటీర్ల (MY Bharat National Youth Volunteers - NYVs) సదస్సు శుక్రవారం (జూలై 17) ఘనంగా ప్రారంభమైంది. దేశ నిర్మాణంలో యువతను భాగస్వామ్యం చేయడమే ధ్యేయంగా ఏర్పాటు చేసిన ఈ జాతీయ స్థాయి సదస్సుకు కేంద్ర యువజన వ్యవహారాలు మరియు క్రీడల శాఖ మంత్రి డాక్టర్ మన్సుఖ్ మాండవియా ముఖ్య అతిథిగా హాజరై, జ్యోతి ప్రజ్వలన చేసి కార్యక్రమాన్ని అధికారికంగా ప్రారంభించారు. అనంతరం దేశవ్యాప్తంగా తరలివచ్చిన వందలాది మంది యువ వాలంటీర్లను ఉద్దేశించి ఆయన ప్రసంగించారు.

ఈ సదస్సులో దేశంలోని వివిధ రాష్ట్రాలు మరియు కేంద్రపాలిత ప్రాంతాల నుండి నెహ్రూ యువ కేంద్ర సంఘటన్ (NYKS) కు చెందిన 1,500 మందికి పైగా ఎంపిక చేసిన యువ వాలంటీర్లు పాల్గొన్నారు. 'మై భారత్' (Mera Yuva Bharat) డిజిటల్ ప్లాట్‌ఫారమ్ ద్వారా గ్రామీణ మరియు పట్టణ ప్రాంతాల్లోని యువతను దేశాభివృద్ధిలో ఎలా మలిచాలో, కేంద్ర ప్రభుత్వ సంక్షేమ పథకాలను క్షేత్రస్థాయిలో ప్రజల్లోకి ఎలా సమర్థవంతంగా తీసుకెళ్లాలో ఈ వేదికపై వివరించారు. దేశంలో సేవ, నాయకత్వ లక్షణాలను పెంపొందించడంలో వాలంటీర్ల పాత్రను కొనియాడారు. కేంద్ర మంత్రి మన్సుఖ్ మాండవియా తన ప్రసంగంలో.. ప్రధానమంత్రి నరేంద్ర మోదీ ఆకాంక్షలకు అనుగుణంగా 2047 నాటికి 'వికసిత్ భారత్' (అభివృద్ధి చెందిన భారతదేశం) లక్ష్యాన్ని సాధించడంలో దేశ యువతే అత్యంత కీలకమైన శక్తి అని నొక్కిచెప్పారు. యువ వాలంటీర్ల ఆలోచనలను, వారి క్షేత్రస్థాయి అనుభవాలను అడిగి తెలుసుకున్న మంత్రి.. సామాజిక సేవా కార్యక్రమాల్లో అద్భుత ప్రతిభ కనబరిచిన ఉత్తమ వాలంటీర్లకు జాతీయ అవార్డులను అందజేసి అభినందించారు.

ఈ ప్రధాన సదస్సు ముగిసిన అనంతరం, ఇదే ప్రాంగణంలో జూలై 18, 19 తేదీలలో (శని, ఆదివారాలు) రెండు రోజుల పాటు ప్రత్యేక 'చింతన్ శివిర్' (ఆలోచనా సస్సు) కొనసాగనుంది. నేషనల్ సర్వీస్ స్కీమ్ (NSS) ను మరింత బలోపేతం చేయడం మరియు పిఎం ఇంటర్న్‌షిప్ స్కీమ్ (PM Internship Scheme) ద్వారా యువతకు ఉపాధి అవకాశాలు కల్పించడం వంటి కీలకమైన అంశాలపై ఈ చింతన్ శివిర్‌లో విస్తృతంగా చర్చించనున్నారు.

హిందూస్తాన్ సమచార్ / Santhosha Laxmi