న్యూఢిల్లీ, 20 జూలై (హి.స.)

పార్లమెంట్ ఉభయ సభల వర్షాకాల సమావేశాలు ప్రారంభమైన తరుణంలో, కేంద్ర ప్రభుత్వం ప్రతిపాదించిన జాతీయ గౌరవ నిరోధక (సవరణ) బిల్లు, 2026 (Prevention of Insults to National Honour Amendment Bill) ను వెనక్కి తీసుకోవాలని డిమాండ్ చేస్తూ సీపీఐ(ఎం) రాజ్యసభ సభ్యుడు జాన్ బ్రిట్టాస్ కేంద్ర హోం మంత్రి అమిత్ షాకు ఒక లేఖ రాశారు. సోమవారం రాజ్యసభలో అమిత్ షా ఈ వివాదాస్పద బిల్లును ప్రవేశపెట్టడానికి సిద్ధమవుతున్న నేపథ్యంలో జాన్ బ్రిట్టాస్ ఈ విజ్ఞప్తి చేయడం ప్రాధాన్యత సంతరించుకుంది. ఈ ప్రతిపాదిత చట్టం ద్వారా జాతీయ గీతానికి (National Anthem), జాతీయ గేయానికి (National Song) మధ్య ఉన్న రాజ్యాంగబద్ధమైన వ్యత్యాసాన్ని దెబ్బతీసేలా ఉందని, తగిన రాజ్యాంగబద్ధమైన కారణాలు లేకుండా నేరపూరిత బాధ్యతను విస్తరించడం సరికాదని ఆయన తన లేఖలో వాదించారు.కేంద్ర ప్రభుత్వం తీసుకువస్తున్న ఈ సవరణ బిల్లు ప్రకారం, 1971 నాటి జాతీయ గౌరవ నిరోధక చట్టంలోని సెక్షన్ 3ను సవరించాలని భావిస్తున్నారు. దీని ద్వారా జాతీయ గేయమైన ‘వందేమాతరం’ ఆలపించడాన్ని ఉద్దేశపూర్వకంగా అడ్డుకున్నా లేదా అంతరాయం కలిగించినా దానిని క్రిమినల్ నేరంగా పరిగణించి శిక్షలు విధించేలా చట్టాన్ని కఠినతరం చేయనున్నారు. భారతదేశ స్వాతంత్ర్య ఉద్యమంలో వందేమాతరం గేయం పోషించిన చారిత్రాత్మక పాత్రను తాను పూర్తిగా గౌరవిస్తానని పేర్కొన్న బ్రిట్టాస్, అయితే ఈ సవరణ రాజ్యాంగ నిర్మాతలు కుదుర్చుకున్న ఒప్పందానికి విరుద్ధంగా ఉందని స్పష్టం చేశారు. మన రాజ్యాంగం 'జనగణమన' (జాతీయ గీతం), 'వందేమాతరం' (జాతీయ గేయం) రెండింటికీ సమాన గౌరవాన్ని ఇచ్చినప్పటికీ, వాటి మధ్య స్పష్టమైన చట్టపరమైన తేడాను ఉంచిందని గుర్తుచేశారు.ఈ విషయమై 1950 జనవరి 24న జరిగిన రాజ్యాంగ పరిషత్ సమావేశాల రికార్డులను బ్రిట్టాస్ ప్రస్తావించారు. అప్పటి అసెంబ్లీ అధ్యక్షుడు డాక్టర్ రాజేంద్ర ప్రసాద్ వందేమాతరానికి జనగణమనతో సమానంగా గౌరవం ఇవ్వబడుతుందని ప్రకటించారని, అయితే అది కేవలం అధ్యక్షుడి ప్రకటన మాత్రమే తప్ప రాజ్యాంగబద్ధమైన నిబంధన లేదా అధికారిక తీర్మానం కాదని వివరించారు. అందుకే 1971లో పార్లమెంటు జాతీయ గౌరవ నిరోధక చట్టాన్ని రూపొందించినప్పుడు, శిక్షార్హమైన నిబంధనలను కేవలం జాతీయ గీతానికి (National Anthem) మాత్రమే పరిమితం చేసిందని, ఒకవేళ చట్టపరమైన సమానత్వం కల్పించాలనే ఉద్దేశం ఉంటే అప్పుడే చట్టంలో చేర్చేవారని పేర్కొన్నారు. దేశంలో వందేమాతరానికి వ్యతిరేకంగా విస్తృతంగా ఎలాంటి అవాంఛనీయ సంఘటనలు జరగనప్పుడు, ఇలాంటి కఠినమైన చట్టాన్ని తీసుకురావాల్సిన అవసరం ఏమొచ్చిందని ఆయన ప్రశ్నించారు.రాజ్యాంగంలోని ఆర్టికల్ 14, 19, 21, 25, 29ల ప్రకారం పౌరులకు కల్పించిన వాక్ స్వాతంత్ర్యం, వ్యక్తిగత స్వేచ్ఛ, అంతఃకరణ స్వేచ్ఛలను ఈ సవరణ ఉల్లంఘించే ప్రమాదం ఉందని బ్రిట్టాస్ ఆందోళన వ్యక్తం చేశారు. పౌరుల ప్రాథమిక విధులను తెలిపే ఆర్టికల్ 51A(a) లో రాజ్యాంగం, జాతీయ పతాకం, జాతీయ గీతాన్ని గౌరవించాలని మాత్రమే ఉందని, అందులో జాతీయ గేయం ప్రస్తావన లేదని గుర్తుచేశారు. 1986 నాటి ప్రసిద్ధ 'బిజోయ్ ఇమ్మాన్యుయేల్ వర్సెస్ కేరళ రాష్ట్రం' కేసులో సుప్రీంకోర్టు ఇచ్చిన తీర్పును ప్రస్తావిస్తూ, విద్యార్థుల నమ్మకాలకు విరుద్ధంగా జాతీయ గీతాన్ని పాడాలని వారిని బలవంతం చేయలేమని కోర్టులు స్పష్టం చేశాయని తెలిపారు. దేశభక్తి అనేది చట్టపరమైన బలవంతం ద్వారా కాకుండా, పౌరులలో స్వచ్ఛంద గౌరవం, విద్య, సామాజిక స్పృహ ద్వారా మాత్రమే పెంపొందించాలని, ఈ సవరణ బిల్లు ద్వారా గౌరవప్రదమైన జాతీయ చిహ్నాన్ని చట్టపరమైన వేధింపుల సాధనంగా మార్చవద్దని కేంద్ర హోం మంత్రికి రాసిన లేఖలో జాన్ బ్రిట్టాస్ విజ్ఞప్తి చేశారు.

---------------

హిందూస్తాన్ సమచార్ / Santhosha Laxmi